កម្មវិធី IATSS Forum 2027 ផ្តល់ឱកាសដល់យុវជនកម្ពុជាអភិវឌ្ឍន៍«ភាពជាអ្នកដឹកនាំ»ថ្នាក់អន្តរជាតិ នៅជប៉ុន

ភ្នំពេញ៖ កម្មវិធី IATSS Forum 2027 កំពុងបើកជ្រើសរើសយុវជនកម្ពុជា ដែលមានបំណងអភិវឌ្ឍន៍ភាពជាអ្នកដឹកនាំ ដើម្បីចូលរួមជាមួយយុវជនដទៃទៀតនៅជុំវិញតំបន់អាស៊ាន សិក្សាស្វែងយល់ និងអភិវឌ្ឍន៍ភាពជាអ្នកដឹកនាំថ្នាក់អន្តរជាតិ នៅប្រទេសជប៉ុន ៨សប្តាហ៍។

កម្មវិធីនេះ ផ្តល់ជូនសម្រាប់យុវជនដែលមានបទពិសោធន៍ និងយល់ពីតម្លៃនៃភាពជាអ្នកដឹកនាំ ការយល់ដឹងអំពីបញ្ហា និងមានឆន្ទៈធ្វើការផ្លាស់ប្តូរ។ បេក្ខជនដែលមានជំនាញ បទពិសោធន៍ និងជំនាញយ៉ាងទូលំទូលាយ ដែលអាចចែករំលែក និងចូលរួមចំណែកដល់កម្មវិធីបណ្តុះបណ្តាល។ បេក្ខជនដែលមានវិន័យ ឯករាជ្យ និងមានអាកប្បកិរិយាវិជ្ជមានចំពោះការរៀនសូត្រ និងគោរពអ្នកដទៃ។

បើតាម IATSS Forum កម្មវិធីផ្តល់ឱកាសដល់យុវជនដែលមកពីបណ្តាប្រទេសនៅតំបន់អាស៊ាន មានអាយុយ៉ាងច្រើន៣៥ឆ្នាំ ជាបុគ្គលិកបម្រើការងារពេញម៉ោងលើជំនាញណាមួយ ជាមួយបទពិសោធន៍ការងារយ៉ាងតិច២ឆ្នាំ។ បេក្ខជនត្រូវតែមានជំនាញភាសាអង់គ្លេសល្អប្រសើរ និងអាចសម្របខ្លួនទៅនឹងវប្បធម៌ ការរស់នៅ និងសិក្សានៅបរទេស។

បន្ថែមពីនេះ ឯកសារដែលកម្មវិធីត្រូវការរួមមាន៖ Application Form សំណួរមូលដ្ឋាន អត្ថបទ លិខិតណែនាំ និងច្បាប់ចម្លងនៃវិញ្ញាបនបត្រជំនាញភាសាអង់គ្លេស។ យុវជនជ័យលាភី នឹងអាចជ្រើសរើសសិក្សា វគ្គទី៧១ ចាប់ពីខែឧសភា-ខែកក្កដា ឆ្នាំ២០២៧ រយៈពេល៨សប្តាហ៍ និងវគ្គទី៧២ចាប់ពីខែកញ្ញា-ខែវិច្ឆិកា ឆ្នាំ២០២៧ រយៈពេល៨សប្តាហ៍។

សម្រាប់យុវជនដែលចាប់អារម្មណ៍លើឱកាសនេះ អាចស្វែងរកព័ត៌មានបន្ថែមតាមរយៈ https://www.iatssforum.jp/en/applications/ និងដាក់ពាក្យយ៉ាងយូរត្រឹមថ្ងៃទី៣០ ខែកញ្ញា ឆ្នាំ២០២៦៕