អ៊ុយក្រែនថា រុស្ស៊ីបើកការវាយប្រហារលើកប៉ាល់ដឹកទំនិញតួកគីសម្លាប់មនុស្សប្រាំនាក់

គៀវ៖ កងទ័ពជើងទឹកអ៊ុយក្រែនអះអាងកាលពីល្ងាច ថ្ងៃ អាទិត្យ ថាការវាយប្រហារដោយមីស៊ីលរបស់រុស្ស៊ីលើកប៉ាល់ដឹកទំនិញរបស់តួកគីដែលដឹកគ្រាប់ធញ្ញជាតិបានសម្លាប់មនុស្សប្រាំនាក់នៅលើកប៉ាល់ ខណៈដែលសមាជិកនាវិកប្រាំនាក់ផ្សេងទៀតបានបាត់ខ្លួន។ កងទ័ពជើងទឹកអ៊ុយក្រែនបញ្ជាក់ទៀតថា រុស្ស៊ីបានបាញ់មីស៊ីលចំនួនបីគ្រាប់ទៅលើកប៉ាល់ Golden Leo ដែលមានទង់ជាតិហ្គីណេ-ប៊ីស្សូ ស្របពេលដែលកប៉ាល់កំពុងតែធ្វើដំណើរចាកចេញពីកន្លែងដែលបានផ្ទុកគ្រាប់ធញ្ញជាតិ។

យោងតាមសេចក្តីថ្លែងការណ៍របស់កងទ័ពជើងទឹកអ៊ុយក្រែនបានចាត់ទុកសកម្មភាពរបស់រុស្ស៊ីនេះគឺជាការវាយប្រហារដោយចេតនារបស់រុស្ស៊ីប្រឆាំងនឹងកប៉ាល់ស៊ីវិលដែលគ្មានអាវុធដែលកាន់ទង់ជាតិបរទេសដែលមិនបង្កការគំរាមកំហែងយោធាអ្វីទាំងអស់។កងទ័ពជើងទឹកអ៊ុយក្រែនថាការវាយប្រហារនេះគឺជាទង្វើភេរវកម្មប្រឆាំងនឹងការស្វែងរកសន្តិភាព និងជាការរំលោភយ៉ាងធ្ងន់ធ្ងរលើច្បាប់មនុស្សធម៌អន្តរជាតិ។អ្នកដែលត្រូវបានវាយប្រហារនេះរួមមាននាវិករួមមានពលរដ្ឋនៃប្រទេសស៊ីរី និងឥណ្ឌា។

រដ្ឋមន្ត្រីការបរទេសអ៊ុយក្រែន លោក Andriy Sybiga បញ្ជាក់ថាមានអ្នកបើកយន្តហោះសមុទ្រអ៊ុយក្រែនម្នាក់ត្រូវបានសម្លាប់ ក៏ដូចជាសមាជិកនាវិកបួននាក់ និងសមាជិកនាវិកប្រាំបីនាក់ត្រូវបានជម្លៀសចេញ និងប្រាំនាក់នៅតែបាត់ខ្លួន។ ដោយមុនការវាយប្រហារលើកប៉ាល់របស់តួកគី យោធារុស្ស៊ីបានបាញ់មីស៊ីលផ្លោងចំនួន ២៤ គ្រាប់ទៅលើទីក្រុងគៀវកាលពីយប់មិញ ដោយបានសម្លាប់មនុស្សម្នាក់ និងរបួស ១៦ នាក់ ហើយផ្លូវដឹកជញ្ជូនសំខាន់ៗកំពុងរងការវាយប្រហារពីកងកម្លាំងប្រដាប់អាវុធរបស់រុស្ស៊ីដែលតែងតែទម្លាក់គ្រាប់បែកលើហេដ្ឋារចនាសម្ព័ន្ធកំពង់ផែរបស់អ៊ុយក្រែន ជាពិសេសតំបន់ Odesa នៅលើសមុទ្រខ្មៅ៕