«លិចទូកដឹកអ្នកដំណើរ»នៅឥណ្ឌូណេស៊ី សម្លាប់មនុស្សម្នាក់ និងបាត់ខ្លួន ២៤នាក់

ហ្សាការតា៖ អាជ្ញាធរឥណ្ឌូណេស៊ី បានថ្លែងកាលពីថ្ងៃព្រហស្បតិ៍ថា មានករណីលិចទូកដឹកអ្នកដំណើរមួយកន្លែង នៅក្បែរកោះសេឡាយ៉ា (Selayar) ភាគខាងត្បូងកោះស៊ូឡាវេស៊ី (Sulawesi) ដែលបានបណ្តាលឱ្យមនុស្សយ៉ាងហោចណាស់ម្នាក់ស្លាប់ និង ២៤ នាក់ផ្សេងទៀតកំពុងបាត់ខ្លួន។

យោងតាមការចុះផ្សាយរបស់កាសែត CAN ប្រធានទីភ្នាក់ងារស្វែងរក និងសង្គ្រោះក្នុងតំបន់ បានរៀបរាប់ថា ឧបទ្ទវហេតុនេះ បង្កឡើងដោយសារបញ្ហាម៉ាស៊ីនទូកដំណើរការមិនប្រក្រតី។

ប្រភពដដែលបានគូសបញ្ជាក់ថា មនុស្សចំនួន ៤៩ នាក់ត្រូវបានជួយសង្គ្រោះដោយជោគជ័យ ស្ត្រីម្នាក់ត្រូវបានរកឃើញថាបានស្លាប់ ខណៈដែល ២៤ នាក់ទៀតកំពុងបន្តស្វែងរកនៅឡើយ។ ឧបសគ្គចម្បងនៅក្នុងប្រតិបត្តិការសង្គ្រោះនេះ គឺអាកាសធាតុមិនអំណោយផល ដោយមានរលកកម្ពស់ ២ ម៉ែត្រ ទៅ ២,៥ ម៉ែត្រ និងមានខ្យល់បោកបក់ខ្លាំង។

យោងតាមបញ្ជីឈ្មោះអ្នកដំណើរផ្លូវការ (Manifest) ទូកនេះត្រូវបានកត់ត្រាថាមានផ្ទុកមនុស្សត្រឹមតែ ៥០ នាក់ប៉ុណ្ណោះ ប៉ុន្តែការផ្ទៀងផ្ទាត់ជាក់ស្តែងបានបង្ហាញថា ចំនួនមនុស្សនៅលើទូកពិតប្រាកដមានរហូតដល់ ៧៤ នាក់។ ការខុសគ្នារវាងបញ្ជីឈ្មោះ និងចំនួនអ្នកដំណើរជាក់ស្តែងនេះ គឺជាបញ្ហាទូទៅមួយដែលកើតឡើងជាញឹកញាប់នៅក្នុងប្រទេសឥណ្ឌូណេស៊ី។

គួរបញ្ជាក់ថា ទូកដឹកអ្នកដំណើរនេះមានឈ្មោះ «Nurul Salsa» នេះ បានចាកចេញពីកោះចាមភា (Jampea Island) កាលពីព្រឹកថ្ងៃពុធ ដោយមានដឹកមនុស្សចំនួន ៧៤ នាក់ ព្រមទាំងដូងក្រៀម សត្វពាហនៈ និងម៉ូតូជាច្រើនគ្រឿង។ នៅក្នុងប្រទេសឥណ្ឌូណេស៊ី ទូកគឺជាមធ្យោបាយធ្វើដំណើរដ៏សំខាន់ ប៉ុន្តែការធូររលុងលើស្តង់ដារសុវត្ថិភាព និងការដឹកលើសចំណុះ តែងតែបង្កឱ្យមានគ្រោះថ្នាក់ជាញឹកញាប់៕