លោកស៊ីជិនពីង នឹងចូលរួមសន្និសីទ AI ពិភពលោកឆ្នាំ ២០២៦ ពីថ្ងៃទី ១៧ ដល់ថ្ងៃទី ២០ ខែកក្កដា

ចិន៖ លោកប្រធានាធិបតីចិន ស៊ីជិនពីង នឹងចូលរួមសន្និសីទ AI ពិភពលោកឆ្នាំ ២០២៦ ដែលនឹងធ្វើឡើងពីថ្ងៃទី ១៧ ដល់ថ្ងៃទី ២០ ខែកក្កដា នៅទីក្រុងសៀងហៃ ប្រទេសចិន ដោយលោកស៊ី នឹងចូលរួមពិធីបើក និងថ្លែងសុន្ទរកថាសំខាន់នៅក្នុងសន្និសីទ AI ដ៏ធំប្រចាំឆ្នាំ ២០២៦ នេះ។ សន្និសីទ AI (WAIC) ចាប់តាំងពីការចាប់ផ្តើមធ្វើឡើងលើកដំបូងនៅឆ្នាំ ២០១៨ សន្និសីទនេះបានវិវត្តទៅជាវេទិកាពហុភាគីដ៏សំខាន់មួយសម្រាប់សហគមន៍អន្តរជាតិដើម្បីចូលរួមក្នុងការសន្ទនាលើ AI និងកសាងការឯកភាពគ្នាលើការគ្រប់គ្រងសកល។

យោងតាមទីភ្នាក់ងារព័ត៌មាន STDaily បានបញ្ជាក់ថាសន្និសីទឆ្នាំនេះក្រោមប្រធានបទ "ភាពជាដៃគូ AI សម្រាប់អនាគតដ៏ភ្លឺស្វាង" និងផ្តល់អត្ថប្រយោជន៍ជាច្រើនដល់ឧស្សាហកម្មទាំងអស់ និងបម្រើផលិតកម្ម និងសម្រួលដល់ជីវិតប្រចាំថ្ងៃ កម្មវិធីនេះនឹងពិភាក្សារួមគ្នាលើការច្នៃប្រឌិតបច្ចេកវិទ្យា ការលើកកម្ពស់ប្រព័ន្ធអេកូឡូស៊ី និងការធ្វើឲ្យ AI ឆ្ពោះទៅរកភាពល្អប្រសើរ និងការចាក់បញ្ចូលសន្ទុះថ្មីទៅក្នុងការអភិវឌ្ឍ AI សកល។

បន្ថែមពីនេះប្រទេសចិនបានពង្រឹងកិច្ចខិតខំប្រឹងប្រែងរបស់ខ្លួនជានិច្ចនៅក្នុងសុខុមាលភាពរួមរបស់ទាំងអស់គ្នា ដោយរួមចំណែ និងដោះស្រាយបញ្ហាសកលផ្សេងដែលកំពុងតែកើតមានដើម្បីលើកកម្ពស់ការអភិវឌ្ឍ AI ធ្វើយ៉ាងណាឲ្យមានមានសណ្តាប់ធ្នាប់ក្នុងទិសដៅដែលមានប្រយោជន៍ មានសុវត្ថិភាព និងយុត្តិធម៌សម្រាប់សកលលោក។

គួររម្លឹកថាកិច្ចប្រជុំ WAIC (World Artificial Intelligence Conference)ឆ្នាំ ២០២៦ និងកិច្ចប្រជុំកម្រិតខ្ពស់ស្តីពីការគ្រប់គ្រង AI សកលនឹងបង្ហាញពីឱកាសដ៏សំខាន់មួយដើម្បីពង្រឹងការឯកភាពគ្នា និងពង្រឹងកិច្ចសហប្រតិបត្តិការរវាងប្រទេសចិន និងប្រទេសនាៗទូទាំងពិភពលោក៕