បុរសជនជាតិជប៉ុនម្នាក់ ត្រូវប៉ូលិសចាប់ខ្លួន ក្រោយ ផ្ញើសារជាង១ពាន់ដង តាមរំខាន សង្សារចាស់

អៃឈិ៖ បុគ្គលិកក្រុមហ៊ុនជនជាតិជប៉ុនម្នាក់អាយុ ២៤ឆ្នាំ ត្រូវបានសមត្ថកិច្ចក្នុង ខេត្តអៃឈិ ចាប់ខ្លួនពី បទរំលោភបំពានច្បាប់ប្រឆាំងការតាមយាយី បន្ទាប់ពីរូបគេបានផ្ញើសារជាង ១,០០០ដង ទៅកាន់អតីតមិត្តស្រីរបស់គេ ដើម្បីបង្ខំឱ្យត្រូវគ្នាវិញ។ នេះបើយោងតាមការចុះផ្សាយរបស់កាសែតជប៉ុន China Daily។

ប្រភពដដែល បានរាយការណ៍ថា នៅចន្លោះថ្ងៃទី២៨ ដល់ថ្ងៃទី៣០ ខែមិថុនា ឆ្នាំ២០២៦ ជនសង្ស័យឈ្មោះ យ៉ូស៊ីដា (Yoshida) បានផ្ញើសារទៅកាន់អតីតមិត្តស្រីអាយុ ២២ឆ្នាំ ចំនួន ១,០៣៥ដង និង ទូរសព្ទទៅនាងចំនួន ២៥ដង ដើម្បីទាមទារឱ្យរូបនាងត្រឡប់មកត្រូវគ្នាជាមួយខ្លួនវិញ។ នៅក្នុងសារទាំងនោះ មានការបង្ហាញការស្រឡាញ់ខ្លាំងហួសហេតុ ដោយរាប់បញ្ចូលទាំងការសរសើរថា នាង «ពិតជាគួរឱ្យស្រឡាញ់ណាស់» និងរូបគេ «ពិតជាស្រឡាញ់នាងខ្លាំងណាស់» ជាដើម។

មុនពេលឈានដល់ការចាប់ខ្លួន ជនរងគ្រោះធ្លាប់ បានស្វែងរកជំនួយពីប៉ូលិស ហើយសមត្ថកិច្ចជប៉ុនក៏បានចេញលិខិតព្រមានជាផ្លូវការទៅកាន់បុរសរូបនេះរួចម្តងមកហើយ ប៉ុន្តែជនសង្ស័យ នៅតែបន្តសកម្មភាពតាមរំខាន។

ក្នុងចម្លើយសារភាពជាមួយប៉ូលីស ជនសង្ស័យ ទទួលស្គាល់រាល់ការចោទប្រកាន់ទាំងអស់ ដោយបានលើកឡើងថា រូបគេមិនអាចទប់ចិត្ត និង មិនអាចលាក់បាំងនូវបំណងប្រាថ្នាដែលចង់វិលត្រឡប់ទៅត្រូវគ្នាជាមួយអតីតមិត្តស្រីវិញបានឡើយ៕