កូរ៉េខាងត្បូង បោះទុនយក្ស ៨៨០ ពាន់លានដុល្លារ លើវិស័យបន្ទះឈីប និង AI

កូរ៉េ៖ កូរ៉េខាងត្បូងបានប្រកាសពីគម្រោងវិនិយោគដ៏ធំសម្បើមមួយ ដែលមានតម្លៃរហូតដល់ទៅយ៉ាងហោចណាស់ ៨៨០ ពាន់លានដុល្លារអាម៉េរិក ដើម្បីពង្រីកការផលិតបន្ទះឈីប (Semiconductors) និងអភិវឌ្ឍបច្ចេកវិទ្យាបញ្ញាសិប្បនិម្មិត (AI) នៅក្នុងប្រទេស សម្រាប់រយៈពេលប៉ុន្មានឆ្នាំខាងមុខនេះ។ គម្រោងនេះស្ថិតនៅក្រោមយុទ្ធសាស្ត្រដែលគេហៅថា «មហាកំពូលគម្រោងទាំងបី» (Three Mega Projects) ដែលផ្តោតលើការបង្កើតមជ្ឈមណ្ឌលផលិតឈីបជំនាន់ថ្មី មជ្ឈមណ្ឌលទិន្នន័យ (Data Centres) និងបច្ចេកវិទ្យារ៉ូបូត (Robotics)។ លោកលី ជេម្យុង បានប្រកាសផែនការទាំងនេះនៅក្នុងព្រឹត្តិការណ៍ផ្សាយតាមទូរទស្សន៍មួយ រួមជាមួយថ្នាក់ដឹកនាំនៃក្រុមហ៊ុន Samsung និង SK Hynix ដែលជាក្រុមហ៊ុនផលិតបន្ទះឈីបធំជាងគេពីររបស់ប្រទេសកូរ៉េ។

បើតាមលោកប្រធានាធិបតីកូរ៉េខាងត្បូង លី ជេម្យុង (Lee Jae Myung) បានបញ្ជាក់កាលពីថ្ងៃច័ន្ទថា ផែនការដៅនេះធ្វើឡើងក្នុងគោលបំណងស្រោចស្រង់ និងជំរុញសេដ្ឋកិច្ចនៅតាមតំបន់នានាដែលនៅក្រៅទីក្រុងសេអ៊ូល លោកថាកូរ៉េត្រូវតែដណ្តើមយកចំណែកទីផ្សារ និងគ្របដណ្តប់លើធាតុស្នូលរបស់ AI ឱ្យបានលឿនជាងប្រទេសដទៃ។

សម្រាប់លោក លី គម្រោងនេះគឺជាបញ្ហានៃ "ការរស់រានមានជីវិត" សម្រាប់ប្រទេសកូរ៉េខាងត្បូង ដើម្បីដោះស្រាយការធ្លាក់ចុះនៅតំបន់ជនបទ ដោយសារតែការប្រមូលផ្តុំឧស្សាហកម្មនៅក្នុងទីក្រុងសេអ៊ូល។ លោកបញ្ជាក់ទៀតថាឥឡូវនេះ យើងត្រូវតែបំបែកវដ្តនៃការរើសអើង និងការរើសអើងដ៏យូរអង្វែងនេះ មិនត្រឹមតែសម្រាប់ជាប្រយោជន៍នៃយុត្តិធម៌ និងសមធម៌ប៉ុណ្ណោះទេ ប៉ុន្តែថែមទាំងដើម្បីធានាបាននូវកំណើនប្រកបដោយចីរភាព និងរួមបញ្ចូលផងដែរ។

ជាមួយគ្នានេះដែរក្រុមហ៊ុនបច្ចេកវិទ្យាយក្សរបស់អាម៉េរិក រួមមាន Google, Amazon និង Meta បានប្រកាសថា ពួកគេនឹងចំណាយប្រាក់រហូតដល់ ៦៥០ ពាន់លានដុល្លារ លើបច្ចេកវិទ្យានេះក្នុងឆ្នាំនេះតែម្តង។ កត្តានេះហើយបានធ្វើឱ្យតម្លៃទីផ្សារភាគហ៊ុនរបស់ក្រុមហ៊ុន SK Hynix បានហក់ឡើងរហូតដល់ជាង ១ ទ្រីលីន (១ លានលាន) ដុល្លារ កាលពីខែឧសភាកន្លងទៅ ដោយសារតែការកើនឡើងនៃតម្រូវការមជ្ឈមណ្ឌលទិន្នន័យ AI៕