កម្ពុជាស្វាគមន៍គំនិតផ្តួចផ្តើមឌីជីថល និងវប្បធម៌អាស៊ាន-ចិន ដើម្បីជំរុញការតភ្ជាប់តំបន់

ចិន៖ កម្ពុជាស្វាគមន៍ការចាប់ផ្តើមគំនិតផ្តួចផ្តើមថ្មីចំនួនពីររវាងអាស៊ាន-ចិន ដែលមានគោលបំណងពង្រឹងកិច្ចសហប្រតិបត្តិការឌីជីថល ការផ្លាស់ប្តូរវប្បធម៌ និងចំណងមិត្តភាពរវាងប្រជាជន និងប្រជាជន ដោយកម្មវិធីទាំងនេះជាកិច្ចខិតខំប្រឹងប្រែងទាន់ពេលវេលា ដើម្បីពង្រឹងការតភ្ជាប់តំបន់ និងជំរុញការចូលរួមកាន់តែជិតស្និទ្ធរវាងរដ្ឋជាសមាជិកអាស៊ាន និងប្រទេសចិន។

គំនិតផ្តួចផ្តើមទាំងនេះកម្មវិធីបង្កើតខ្លឹមសារប្រព័ន្ធផ្សព្វផ្សាយសង្គមអាស៊ាន-ចិន និងស៊េរីទេសចរណ៍បេតិកភណ្ឌវប្បធម៌យុវជនអាស៊ាន-ចិន ឆ្នាំ២០២៦ ត្រូវបានបង្ហាញក្នុងអំឡុងពេលវេទិកាសហប្រតិបត្តិការប្រព័ន្ធផ្សព្វផ្សាយអាស៊ាន-ចិន ឆ្នាំ២០២៦ នៅទីក្រុងសិនយ៉ាង ខេត្តលាវនីង កាលពីថ្ងៃអង្គារ។

កម្មវិធីទាំងនេះត្រូវបានរចនាឡើងដើម្បីលើកកម្ពស់កិច្ចសហប្រតិបត្តិការប្រព័ន្ធផ្សព្វផ្សាយសម័យឌីជីថល ពង្រឹងការយោគយល់គ្នាទៅវិញទៅមក និងលើកទឹកចិត្តដល់កិច្ចសហការកាន់តែខ្លាំងឡើងក្នុងចំណោមយុវជន អ្នកជំនាញប្រព័ន្ធផ្សព្វផ្សាយ និងអ្នកមានឥទ្ធិពលឌីជីថលនៅទូទាំងអាស៊ាន និងចិន។

បើតាមលោក ប្រាក់ ថាវអាមិដា អនុរដ្ឋលេខាធិការក្រសួងព័ត៌មាន និងជាប្រធានមន្ត្រីជាន់ខ្ពស់កម្ពុជាទទួលបន្ទុកព័ត៌មានបានស្វាគមន៍កម្មវិធីបង្កើតប្រព័ន្ធផ្សព្វផ្សាយសង្គម។ លោកបានមានប្រសាសន៍ថា “គំនិតផ្តួចផ្តើមនេះគឺទាន់ពេលវេលា និងមានសារៈសំខាន់ ដោយសារអ្នកបង្កើតខ្លឹមសារឌីជីថលកំពុងក្លាយជាដៃគូដ៏មានឥទ្ធិពលក្នុងការទំនាក់ទំនងសាធារណៈ ការផ្លាស់ប្តូរវប្បធម៌ និងការតភ្ជាប់រវាងប្រជាជន និងប្រជាជន”។

លោកបានលើកទឹកចិត្តអ្នកបង្កើតខ្លឹមសារឱ្យផលិតខ្លឹមសារដែលអាចទុកចិត្តបាន ច្រើនភាសា និងគោរពវប្បធម៌ លោកជំរុញឲ្យជួយកសាងទំនាក់ទំនងកាន់តែរឹងមាំរវាងអាស៊ាន និងចិនតាមរយៈការចូលរួមឌីជីថលដែលមានទំនួលខុសត្រូវ។

ជាមួយគ្នានេះលោក ឆាង បូ ប្រធានក្រុមទំនាក់ទំនងអន្តរជាតិចិន (CICG) បានមានប្រសាសន៍ថា អង្គការប្រព័ន្ធផ្សព្វផ្សាយដើរតួនាទីពិសេសក្នុងការលើកកម្ពស់ការយោគយល់គ្នាទៅវិញទៅមក និងពង្រឹងចំណងមិត្តភាពរវាងប្រជាជន និងប្រជាជន។លោកបានសម្តែងក្តីសង្ឃឹមថា កិច្ចសហប្រតិបត្តិការប្រព័ន្ធផ្សព្វផ្សាយកាន់តែស៊ីជម្រៅនឹងបង្កើតបរិយាកាសមតិសាធារណៈអំណោយផលសម្រាប់កិច្ចសហការអាស៊ាន-ចិន។

លោកស្រី ណារីយ៉ា អេស. សូប្រាបតូ អគ្គលេខាធិការរងអាស៊ាន បានពិពណ៌នាអំពីទំនាក់ទំនងអាស៊ាន-ចិនថាជាភាពជាដៃគូដ៏ស្វាហាប់បំផុតមួយរបស់ពិភពលោក ដោយកត់សម្គាល់ថា ប្រទេសចិនគឺជាដៃគូពាណិជ្ជកម្មធំបំផុតរបស់អាស៊ានអស់រយៈពេល ១៧ ឆ្នាំជាប់ៗគ្នា ខណៈដែលអាស៊ាននៅតែជាដៃគូពាណិជ្ជកម្មកំពូលរបស់ចិនអស់រយៈពេល ៦ ឆ្នាំកន្លងមក៕