ចិន៖ ប្រទេសចិន នៅថ្ងៃទី ៣១ ឧសភានេះ បានតេស្តដោយជោគជ័យលើការបាញ់បញ្ជូន«ផ្កាយរណប»ថ្មី ដើម្បីពង្រឹងគុណភាព បច្ចេកវិទ្យាអ៊ីនធឺណិត ទៅកាន់លំហអាកាស។ការតេស្តថ្មីនេះ ធ្វើឡើងនៅមជ្ឈមណ្ឌលបាញ់បង្ហោះផ្កាយរណប Xichang នៅខេត្ត Sichuan ភាគនិរតីនៃប្រទេសចិន។
យោងតាមបណ្តាញផ្សព្វផ្សាយចិន ផ្កាយរណបនេះ ត្រូវបានបាញ់បង្ហោះនៅលើរ៉ុក្កែត Long March-2D ហើយបានចូលទៅក្នុងគន្លងដែលបានកំណត់ទុកជាមុន។ផ្កាយរណបនេះ នឹងត្រូវបានប្រើជាចម្បង ដើម្បីអនុវត្តការធ្វើតេស្ត និង ការផ្ទៀងផ្ទាត់បច្ចេកវិទ្យា រួមទាំងការតភ្ជាប់ អ៊ីនធឺណិត ពីផ្កាយរណប ទៅទូរស័ព្ទដោយផ្ទាល់ និង ការរួមបញ្ចូលបណ្តាញដីអវកាស។
គួរបញ្ជាក់ថា ការបាញ់បង្ហោះនេះ ត្រូវបានក្រុមអ្នកវិទ្យាសាស្ត្រចិន ចាត់ទុកថា គឺជាបេសកកម្មហោះហើរលើកទី ៦៤៦ របស់រ៉ុក្កែតដឹកជញ្ជូនស៊េរី Long March៕
