អ៊ីស្រាអែល៖ អង្គការសហប្រជាជាតិ (UN) បានសម្រេច «បញ្ចូលប្រទេសអ៊ីស្រាអែលទៅក្នុងបញ្ជីខ្មៅនៃអំពើហិង្សាផ្លូវភេទនៅក្នុងតំបន់ជម្លោះ»។ វិធានការនេះបានជំរុញឱ្យភាគីអ៊ីស្រាអែលប្រកាសកាត់ផ្តាច់ទំនាក់ទំនងភ្លាមៗជាមួយលោក Antonio Guterres អគ្គលេខាធិការ UN។ នេះបើតាមការបញ្ជាក់ពីឯកអគ្គរដ្ឋទូតអ៊ីស្រាអែលប្រចាំUN។
នៅក្នុងវីដេអូមួយដែលបានបង្ហោះនៅលើបណ្តាញសង្គម X កាលពីថ្ងៃព្រហស្បតិ៍ លោក Danny Danon ឯកអគ្គរដ្ឋទូតអ៊ីស្រាអែលប្រចាំ UN បានថ្លែងយ៉ាងដាច់អហង្ការថា៖ «យើងអស់ការត្រូវនិយាយជាមួយអគ្គលេខាធិការរូបនេះហើយ»។
បេសកកម្មការទូតអ៊ីស្រាអែលប្រចាំ UN ក៏បានប្រកាសដែរថា ខ្លួននឹងមិនធ្វើការទាក់ទងណាមួយជាមួយការិយាល័យអគ្គលេខាធិការឡើយ ដរាបណាលោក Guterres នៅតែបន្តកាន់តំណែងជាប្រមុខដឹកនាំ។ ចំណែកឯក្រសួងការបរទេសអ៊ីស្រាអែលវិញ បានរិះគន់ការសម្រេចចិត្តនេះថាជារឿង «គួរឱ្យអាម៉ាស់ និងមិនសមហេតុផល» ព្រមទាំងបានចោទប្រកាន់ UN ថាជាស្ថាប័នពុករលួយ និងលម្អៀងខាងនយោបាយ ដែលតែងតែផ្តោតគោលដៅវាយប្រហារលើប្រទេសអ៊ីស្រាអែល។
លោក Danon បានបន្ថែមថា ការចោទប្រកាន់ថាអ៊ីស្រាអែលប្រើប្រាស់អំពើហិង្សាផ្លូវភេទជាអាវុធក្នុងសង្គ្រាម គឺជាការសម្រេចចិត្តដ៏ឃោរឃៅ និងអយុត្តិធម៌បំផុត។ លោកបានរិះគន់ចំៗទៅលើអគ្គលេខាធិការ និងក្រុមការងារថាបានបន្តផ្សព្វផ្សាយព័ត៌មានមិនពិតប្រឆាំងនឹងអ៊ីស្រាអែល ហើយការដាក់ប្រទេសអ៊ីស្រាអែលឱ្យស្ថិតក្នុងបញ្ជីខ្មៅតែមួយជាមួយក្រុម Hamas គឺជារឿងដែលមិនអាចទទួលយកបានជាដាច់ខាត។
ជាការឆ្លើយតប លោកស្រី Reem Alsalem អ្នករាយការណ៍ពិសេសរបស់ UN ស្តីពីអំពើហិង្សាលើស្ត្រី និងកុមារី បានលើកឡើងថា វិធានការនេះគឺជារឿងដែល «ហួសពេលយូរណាស់មកហើយ»។ លោកស្រីបានសម្តែងការខកចិត្តចំពោះការយឺតយ៉ាវកន្លងមក ដោយហេតុថាមានភស្តុតាងជាច្រើនដែលត្រូវបានកត់ត្រា និងផ្ទៀងផ្ទាត់ដោយឯករាជ្យ ជុំវិញការប្រព្រឹត្តអំពើហិង្សាផ្លូវភេទជាប្រព័ន្ធ ក្នុងទ្រង់ទ្រាយធំ និងគួរឱ្យរន្ធត់ដោយភាគីអ៊ីស្រាអែល ទៅលើស្ត្រី បុរស និងកុមារប៉ាឡេស្ទីន។
