វៀតណាម៖ ចាប់ពីថ្ងៃទី ១ ខែកក្កដាខាងមុខនេះតទៅ អាជ្ញាធរវៀតណាមនឹងដាក់ចេញនូវវិធានការរឹតបន្តឹងជាកំហិត ដោយតម្រូវឱ្យអ្នកដំណើរទាំងអស់ដែលធ្វើដំណើរចូល ចាកចេញ ឬឆ្លងកាត់ប្រទេសវៀតណាម ត្រូវតែបំពេញលិខិតប្រកាសសុខភាព និងឆ្លងកាត់ការពិនិត្យវាស់កម្ដៅនៅគ្រប់ប៉ុស្តិ៍ត្រួតពិនិត្យព្រំដែន។ នេះជាវិធានការឆ្លើយតបបន្ទាន់ទៅនឹងការគំរាមកំហែងជាសកលនៃជំងឺវីរុសអេបូឡា (EVD) ដែលកំពុងមានការរីករាលដាលគួរឱ្យព្រួយបារម្ភ។ គួររំលឹកថា ជំងឺអេបូឡាមានអត្រាស្លាប់ជាមធ្យមខ្ពស់រហូតដល់ប្រហែល ៥០ ភាគរយ ហើយវាអាចឆ្លងតាមរយៈការប៉ះពាល់ផ្ទាល់ជាមួយវត្ថុរាវក្នុងរាងកាយរបស់អ្នកជំងឺ។
ការសម្រេចចិត្តដ៏តឹងរ៉ឹងនេះ ធ្វើឡើងបន្ទាប់ពីអង្គការសុខភាពពិភពលោក (WHO) កាលពីថ្ងៃទី ១៧ ខែឧសភា បានប្រកាសជាផ្លូវការថា ការផ្ទុះឡើងនៃជំងឺអេបូឡានេះជា «អាសន្នសុខភាពសាធារណៈដែលគួរឱ្យព្រួយបារម្ភជាអន្តរជាតិ» ដែលជាកម្រិតប្រកាសអាសន្នសុខភាពសកលខ្ពស់បំផុត។
យោងតាមទិន្នន័យគិតត្រឹមថ្ងៃទី ២៨ ខែឧសភា សាធារណរដ្ឋប្រជាធិបតេយ្យកុងហ្គោ (DRC) បានកត់ត្រាករណីឆ្លងជិត ១,០០០ ករណី និងមានអ្នកស្លាប់បាត់បង់ជីវិតជាង ២០០ នាក់ ខណៈដែលប្រទេសអ៊ូហ្គង់ដាក៏ស្ថិតក្នុងចំណោមប្រទេសដែលរងផលប៉ះពាល់ធ្ងន់ធ្ងរផងដែរ។
