ស៊ីសាំង៖ ការធ្វើកសិកម្មនៅលើតំបន់ខ្ពង់រាបដែលខ្ពស់ជាងគេបំផុតនៅលើពិភពលោក អាចស្តាប់ទៅដូចជាមិនអាចទៅរួចនោះឡើយ ប៉ុន្តែនៅក្នុងតំបន់ស្វយ័តស៊ីសាំង (ទីបេ) ក្រុមអ្នកស្រាវជ្រាវកំពុងប្រើប្រាស់បច្ចេកវិទ្យាទំនើបចុងក្រោយ ដើម្បីជម្នះរាល់ដែនកំណត់នៃធម្មជាតិ។មនុស្សភាគច្រើនតែងតែគិតថា តំបន់ស៊ីសាំងមានតែភ្នំទឹកកក និងវាលស្មៅក្រៀមក្រោះ មិនអំណោយផលសម្រាប់ការដាំដុះ តែបច្ចុប្បន្ននៅក្នុងផ្ទះកញ្ចក់នាទីក្រុងឡាសា (Lhasa) ផ្លែទំពាំងបាយជូរ គ្រាប់កាហ្វេ និងសូម្បីតែត្រីស្រស់ៗ កំពុងត្រូវបានដាំដុះ និងផលិតឡើងយ៉ាងជោគជ័យ ក្រោមគម្រោងកសិកម្មបច្ចេកវិទ្យាជាន់ខ្ពស់។
យោងតាមការចុះផ្សាយរបស់សារព័ត៌មាន CGTN វិទ្យាស្ថានវិទ្យាសាស្ត្រកសិកម្ម និងសត្វឃ្វាលស៊ីសាំង បានធ្វើការសាកល្បងដាំដុះពូជទំពាំងបាយជូររហូតដល់ ៦០ ប្រភេទ ហើយបានរកឃើញពូជចំនួន ៦ ប្រភេទ ដែលមានភាពស៊ាំ និងសមស្របទៅនឹងលក្ខខណ្ឌអាកាសធាតុដ៏អាក្រក់នៅទីនោះ។ លោក ចាង ខាយ (Zhang Kai) អ្នកស្រាវជ្រាវកសិកម្មបានពន្យល់ថា ពន្លឺព្រះអាទិត្យខ្លាំង និងការប្រែប្រួលសីតុណ្ហភាពខុសគ្នាច្រើនរវាងថ្ងៃនិងយប់ បានធ្វើឱ្យផ្លែទំពាំងបាយជូរដែលដាំដុះនៅទីនេះមានរសជាតិកាន់តែផ្អែមឆ្ងាញ់។
លោកបានគូសបញ្ជាក់បន្ថែមថា អ្វីដែលរឹតតែគួរឱ្យភ្ញាក់ផ្អើលនោះគឺ សូម្បីតែដើមកាហ្វេដែលជាប្រភេទរុក្ខជាតិតំបន់ក្ដៅបង្គួរ ក៏អាចលូតលាស់បានយ៉ាងល្អដែរ តាមរយៈការប្រើប្រាស់សំណាញ់បាំងកម្ដៅ ការបង្កើនកម្រិតសំណើម និងការប្រើស្រទាប់អ៊ីសូឡង់ការពារកម្តៅដើម្បីរក្សាសីតុណ្ហភាពមិនឱ្យទាបជាង ៨ អង្សាសេ នាពេលយប់។ នាពេលបច្ចុប្បន្ន ក្រុមអ្នកស្រាវជ្រាវកំពុងមានគម្រោងសហការជាមួយក្រុមហ៊ុនក្នុងស្រុក ដើម្បីពង្រីកការផលិតទ្រង់ទ្រាយធំ ក្នុងគោលបំណងផ្គត់ផ្គង់បន្លែ ផ្លែឈើ និងត្រីស្រស់ៗជូនប្រជាជនក្នុងតំបន់ ដោយមិនចាំបាច់ចំណាយលើថ្លៃដឹកជញ្ជូនពីតំបន់ឆ្ងាយៗឡើយ៕
