ថៃ៖ រដ្ឋាភិបាលថៃ កាលពីថ្ងៃចន្ទ ទី២៥ ខែឧសភា បានប្រកាសដាក់ប្រទេសស្ថិតក្រោមការប្រុងប្រយ័ត្នផ្នែកបរិស្ថានកម្រិតអតិបរមា បន្ទាប់ពីអាជ្ញាធរឧតុនិយម និងគ្រប់គ្រងទឹកថៃ បានចេញសេចក្តីថ្លែងការណ៍រួមបន្ទាន់មួយ ដោយព្រមានថា ប្រទេសថៃកំពុងឈានចូលដល់គ្រោះរាំងស្ងួតដ៏ធ្ងន់ធ្ងរបំផុតក្នុងប្រវត្តិសាស្ត្រ។
យោងតាមការចុះផ្សាយរបស់សារព័ត៌មានថៃ The Nation វិបត្តិនេះបង្កឡើងដោយបាតុភូតអាកាសធាតុដ៏ខ្លាំងក្លា «Super El Niño» ដែលធ្វើឱ្យសីតុណ្ហភាពផ្ទៃទឹកសមុទ្រនៅមហាសមុទ្រប៉ាស៊ីហ្វិកកណ្តាល និងខាងកើតកើនឡើងខុសប្រក្រតី រាំងខ្ទប់ការកកើតពពក និងទឹកភ្លៀងមូសុង ដែលជំរុញឱ្យមានរលកកម្តៅកើនឡើងខ្ពស់កំណត់ត្រាលើសពី ៤៥ អង្សាសេ។
អាកាសធាតុដ៏ក្តៅហួតហែងខុសពីធម្មតានេះ ត្រូវបានគេរំពឹងថានឹងអូសបន្លាយពេលជាច្រើនខែ ដែលអាចរំខានដល់វិស័យកសិកម្ម បង្កគ្រោះថ្នាក់ដល់សុខភាពសាធារណៈ និងដាក់សម្ពាធយ៉ាងខ្លាំងលើប្រព័ន្ធថាមពលជាតិ។
អ្នកជំនាញព្យាករណ៍អាកាសធាតុថៃ បានព្រមានថា វិបត្តិអាសន្នអាកាសធាតុនេះនឹងជះឥទ្ធិពលបំផ្លិចបំផ្លាញលើវិស័យសំខាន់ៗចំនួនប្រាំ។ វិស័យទាំងនោះរួមមាន រលកកម្តៅខ្លាំងមិនធ្លាប់មាននៅតំបន់វាលទំនាបកណ្តាល និងភាគខាងជើង, ការស្រកចុះកម្រិតទឹកក្នុងអាងស្តុកទឹកយ៉ាងគំហុកដែលគំរាមកំហែងដល់ទឹកបរិភោគ និងការស្រោចស្រព, និងការធ្លាក់ចុះយ៉ាងខ្លាំងនៃទិន្នផលដំណាំដែលប៉ះពាល់ដល់សន្តិសុខស្បៀង និងសេដ្ឋកិច្ចជនបទ។ លើសពីនេះ ស្ថានភាពស្ងួតហួតហែងខ្លាំងក៏បានបង្កើនហានិភ័យនៃភ្លើងឆេះព្រៃ និងបង្កើតផ្សែងពុល PM2.5 យ៉ាងធ្ងន់ធ្ងរ ខណៈពេលដែលហេដ្ឋារចនាសម្ព័ន្ធប្រើប្រាស់ទឹក និងអគ្គិសនីជាតិត្រូវប្រឈមនឹងការកើនឡើងតម្រូវការយ៉ាងគំហុក ដែលអាចប៉ះពាល់ដល់ស្ថិរភាពនៃការផ្គត់ផ្គង់ថាមពលទូទាំងប្រទេស។
