ស្លាប់កើនដល់ ៨២នាក់ និងបាត់ខ្លួន ២នាក់ក្នុងហេតុការណ៍ផ្ទុះអណ្តូងរ៉ែធ្យូងថ្មនៅចិន

ចិន៖ ហេតុការណ៍ផ្ទុះឧស្ម័នយ៉ាងធ្ងន់ធ្ងរមួយ បានកើតឡើងនៅអណ្តូងរ៉ែធ្យូងថ្ម លីវសិនយូ (Liushenyu) ស្ថិតក្នុងស្រុក ឈីនយាន (Qinyuan) ខេត្តសានស៊ី (Shanxi) កាលពីល្ងាចថ្ងៃទី២២ ខែឧសភា។ ឧបទ្ទវហេតុនេះបានសម្លាប់មនុស្សអស់ ៨២នាក់ ខណៈ ២នាក់ទៀតកំពុងបាត់ខ្លួន នៅពេលដែលកម្មករជាង ២០០នាក់កំពុងធ្វើការនៅក្រោមដី។ ក្នុងចំណោមអ្នករស់រានមានជីវិត មានមនុស្សចំនួន ១២៨នាក់ កំពុងសម្រាកព្យាបាលនៅមន្ទីរពេទ្យ ដោយក្នុងនោះមានអ្នករងរបួសធ្ងន់ធ្ងរខ្លាំងចំនួន ៤នាក់។នេះបើយោងតាមប្រព័ន្ធផ្សព្វផ្សាយរដ្ឋចិន។

ភ្លាមៗក្រោយផ្ទុះហេតុការណ៍នេះ ក្រុមសង្គ្រោះបន្ទាន់បានបញ្ជូនកម្លាំងជំនាញ និងបុគ្គលិកពេទ្យជាង ១,១០០នាក់ រួមទាំងរថយន្តសង្គ្រោះ ៨៦គ្រឿង និងឧបករណ៍ជំនួយដកដង្ហើមសម្ពាធខ្ពស់ទៅកាន់ទីតាំងកើតហេតុ ដោយមានការគាំទ្រផ្នែកវេជ្ជសាស្ត្រពីអ្នកជំនាញនៅទីក្រុងប៉េកាំងផងដែរ។ កំឡុងពេលប្រតិបត្តិការស្វែងរក ក្រុមសង្គ្រោះបន្ទាន់ជួបការលំបាកខ្លាំង ដោយសារតែកម្រិតឧស្ម័នពុលនៅក្រោមដីឡើងខ្ពស់ពេក ដែលបង្ខំឱ្យអាជ្ញាធរប្រើប្រាស់រ៉ូបូតបច្ចេកវិទ្យាខ្ពស់ចូលទៅពិនិត្យជំនួសវិញ ដើម្បីការពារសុវត្ថិភាព។

ជុំវិញករណីនេះ អាជ្ញាធរចិនបានឃាត់ខ្លួនម្ចាស់អាជីវកម្ម និងអ្នកគ្រប់គ្រង បន្ទាប់ពីរាវរកឃើញថាមាន «ការរំលោភច្បាប់ធ្ងន់ធ្ងរ» ព្រមទាំងបានបញ្ជាឱ្យផ្អាកដំណើរការអណ្តូងរ៉ែទាំង ៤ របស់ក្រុមហ៊ុន ទុងចូវ (Tongzhou Coal and Coke Group) ទាំងស្រុងដើម្បីត្រួតពិនិត្យប្រព័ន្ធសុវត្ថិភាពឡើងវិញ៕