ភ្នំពេញ៖ កម្មវិធីប្រកួតគំនូរ និងស្នាដៃស្ត្រី ជំនាន់ទី១៣ នាថ្ងៃទី១៧ ខែឧសភា បានរកឃើញយុវតីជាម្ចាស់ជ័យលាភីចំនួន ៣រូប ដែលមានស្នាដៃគំនូរ និងភាពច្នៃប្រឌិតដែលលេចធ្លោក្នុងការរចនាសម្បកវេចខ្ចប់ផលិតផលក្នុងស្រុក។ កម្មវិធីនេះ ធ្វើឡើងក្នុងគោលបំណងលើកកម្ពស់ទេពកោសល្យ សិល្បៈច្នៃប្រឌិត និងស្នាដៃរបស់ស្រ្តីវ័យក្មេងកម្ពុជា និងជួយបង្កើនគុណតម្លៃសម្បកវេចខ្ចប់ផលិតផលខ្មែរឱ្យកាន់តែមានភាពទាក់ទាញ និងអាចប្រកួតនៅក្នុងទីផ្សារ។
យោងតាមគេហទំព័រផ្លូវការរបស់ DREAM GIRLS Design Contest យុវតីឆ្នើមទាំងបីរូបដែលទទួលបានជ័យលាភីរួមមាន ជ័យលាភីលេខ២ មានចំនួន២រូប បានទៅលើ យុវតី ឈូ យូហ៊ុយ និងយុវតី ភាព វណ្ណេ ប្រានីកា និងជ័យលាភីលេខ៣ បានទៅលើ យុវតី ឈួត ស៊ីតដឺនី។ នៅក្នុងកម្មវិធី មិនមានយុវតីដែលទទួលបានជ័យលាភីលេខ១ នោះទេ។
គួរបញ្ជាក់ថា កម្មវិធីនេះគឺជាការច្នៃបញ្ចូលរវាងភាពច្នៃប្រឌិតនៃគំនូរជាមួយផលិតផលក្នុងស្រុកតាមរយៈការធ្វើជាសម្បកវេចខ្ចប់ សូកូឡាគ្រាប់ស្វាយចន្ទី អាហារសម្រន់ និងផលិតផលខ្មែរជាច្រើនទៀតផងដែរ៕
