ក្រសួងប្រៃសណីយ៍ រៀបចំប្រកួតផលិតវីដេអូ «អប់រំអំពីសន្តិសុខសាយប័រ»

ភ្នំពេញ៖ ក្រសួងប្រៃសណីយ៍ និងទូរគមនាគមន៍ រៀបចំ “ការប្រកួតវីដេអូអប់រំខ្នាតខ្លីស្តីសន្តិសុខសាយប័រឆ្នាំ ២០២៦ - Cybersecurity Short Video Competition 2026” ដើម្បីឆ្លើយតបនឹងការគំរាមកំហែងតាមអនឡាញ និងបញ្ជ្រាបចំណេះដឹងផ្នែកសន្តិសុខសាយប័រនៅកម្ពុជា ហើយកម្មវិធីនឹងជ្រើសរើសវីដេអូដែលល្អបំផុតមួយទៅដាក់ប្រកួតនៅក្នុងកម្មវិធី ASEAN-Japan Cybersecurity Video Competition។ ចំពោះបេក្ខជនជាប់ចំណាត់ថ្នាក់លេខ១ នឹងទទួលបានទឹកប្រាក់ ២លានរៀល, លេខ២ ទទួលបានទឹកប្រាក់១លានរៀល, និងលេខ៣ ទទួលបានទឹកប្រាក់៦០ម៉ឺនរៀល។

យោងតាមសេចក្តីជូនដំណឹងរបស់ក្រសួងប្រៃសនីយ៍ ដើម្បីដាក់ពាក្យចូលរួមប្រកួតបេក្ខជនត្រូវបំពេញតាមលក្ខខណ្ឌដូចជា ជាសិស្ស ឬនិស្សិតដែលកំពុងសិក្សានៅក្នុងគ្រឹះស្ថានអប់រំនានាចាប់ពីថ្នាក់អនុវិទ្យាល័យឡើងទៅ និងមានអាយុមិនលើសពី ៣០ឆ្នាំ ព្រមទាំងមានភាពច្នៃប្រឌិតខ្ពស់ក្នុងការផលិត និងបង្ហោះវីដេអូជាសាធារណៈ។ ជាមួយគ្នានេះ ចំពោះលក្ខន្តិកៈវីដេអូវិញ បេក្ខជនត្រូវផលិតវីដេអូដែលមានរយៈពេលចន្លោះពី ៣០ទៅ ៦០នាទី និងជាស្នាដៃដើមដែលមិនមានការលួចចម្លងពីគេ។ មួយវិញទៀត វីដេអូដែលផលិតចេញមក ប្រសិនបើជាភាសាខ្មែរត្រូវមានចំណងជើងរង(Subtitle) ជាភាសាអង់គ្លេស និងប្រសិនបើជាភាសាអង់គ្លេសត្រូវមានចំណងជើងរង (Subtitle) ជាភាសាខ្មែរ។ នៅចុងបញ្ចប់វីដេអូ បេក្ខជនត្រូវបញ្ជូលឈ្មោះសាមីខ្លួន និងឈ្មោះគ្រឹះស្ថានសិក្សា បន្ទាប់មកបង្ហោះវីដេអូជាសាធារណៈតាមបណ្តាញសង្គមហ្វេសប៊ុក និងតិកតុកផ្ទាល់ខ្លួន។