រញ្ជួយដីកម្រិត ៥,២ រ៉ិចទ័រនៅចិនបណ្តាលឱ្យមនុស្ស ៣នាក់បាត់ខ្លួន និង ៤នាក់រងរបួស

ចិន៖ អាជ្ញាធរសង្គ្រោះគ្រោះមហន្តរាយក្នុងតំបន់ ក្នុងស្រុក Liunan ទីក្រុង Liuzhou នៃតំបន់ស្វយ័ត Guangxi Zhuang ប្រទេសចិន នៅព្រឹកថ្ងៃច័ន្ទ ទី១៨ ខែឧសភានេះបានបញ្ជាក់ថា គ្រោះរញ្ជួយដីកម្រិត ៥,២ រិចទ័រ បានអង្រួនយ៉ាងខ្លាំង នៅទូទាំងទីក្រុង Liuzhou, Guigang, Wuzhou, Hechi, Nanning និងបណ្តាលក្រុងនានានៅក្បែរនោះ។ ហេតុការណ៍នេះបានបណ្តាលឱ្យមនុស្ស ៣ នាក់បាត់ខ្លួន និង ៤ នាក់ទៀតរងរបួស ប៉ុន្តែមិនស្ថិតក្នុងស្ថានភាពគ្រោះថ្នាក់ដល់ជីវិតនោះទេ។

យោងតាមការចុះផ្សាយរបស់សារព័ត៌មាន China Daily ដោយផ្អែកលើទិន្នន័យពីរដ្ឋបាលរញ្ជួយដី Guangxi បានឱ្យដឹងថា គ្រោះធម្មជាតិនេះបានកើតឡើងនៅវេលាម៉ោង ០:២១ នាទីរំលងអធ្រាត្រឈានចូលថ្ងៃច័ន្ទ ក្នុងជម្រៅដី ៨ គីឡូម៉ែត្រ។ ចំណុចរញ្ជួយចំកណ្តាល (Epicenter) ស្ថិតនៅក្នុងទីប្រជុំជន Taiyangcun ដែលមានចម្ងាយប្រមាណ ១៦ គីឡូម៉ែត្រពីកណ្តាលទីក្រុង Liuzhou។

ប្រភពដដែលបានបន្តថា រលកញ័ររញ្ជួយត្រូវបានគេដឹងយ៉ាងច្បាស់នៅទូទាំងទីក្រុង Liuzhou, Guigang, Wuzhou, Hechi, Nanning និងបណ្តាក្រុងនានានៅក្បែរនោះ។ គិតត្រឹមម៉ោង ៤ ទៀបភ្លឺ ថ្ងៃដដែល អគារចំនួន ១៣ ខ្នងបានដួលរលំនៅក្នុងតំបន់រងគ្រោះ។

ភ្លាមៗបន្ទាប់ពីកើតហេតុ អាជ្ញាធរចិនបានប្រកាសដាក់ឱ្យអនុវត្តផែនការឆ្លើយតបនឹងគ្រោះអាសន្នរញ្ជួយដីថ្នាក់ជាតិកម្រិត៤ IV (Level IV)។ ក្រុមសង្គ្រោះបន្ទាន់ ដែលរួមមានបុគ្គលិកគ្រប់គ្រងគ្រោះអាសន្ន កងកម្លាំងនគរបាល ភ្នាក់ងារពន្លត់អគ្គិភ័យ និងក្រុមជំនាញបច្ចេកទេស ត្រូវបានចាត់តាំងឱ្យចុះអន្តរាគមន៍ជាបន្ទាន់ ដើម្បីស្វែងរកអ្នកបាត់ខ្លួន ជម្លៀសប្រជាពលរដ្ឋ និងចុះត្រួតពិនិត្យសុវត្ថិភាពទ្រង់ទ្រាយធំលើហេដ្ឋារចនាសម្ព័ន្ធនានា រួមមាន អគារ ផ្លូវថ្នល់ ស្ពាន តំបន់អណ្តូងរ៉ែ ក៏ដូចជាទីតាំងដែលអាចប្រឈមនឹងគ្រោះថ្នាក់ភូមិសាស្ត្រខ្ពស់ (ដីបាក់) ជាដើម។ បន្ថែមលើនេះ ក្រុមការងារពិសេសមួយក៏ត្រូវបានបញ្ជូនទៅកាន់តំបន់រងគ្រោះ ដើម្បីដឹកនាំ និងសម្របសម្រួលកិច្ចសង្គ្រោះផ្ទាល់នៅនឹងកន្លែង។

តាមរយៈកិច្ចអន្តរាគមន៍ភ្លាមៗ ពលរដ្ឋចិនក្នុងតំបន់រងគ្រោះជាង ៧,០០០ នាក់ ត្រូវបានជម្លៀសទៅកាន់ទីទួលសុវត្ថិភាពដោយជោគជ័យ។ ដោយឡែក សេវាសាធារណៈជាមូលដ្ឋាន រួមមាន ប្រព័ន្ធទំនាក់ទំនងទូរគមនាគមន៍ បណ្តាញអគ្គិសនី ទឹកស្អាត ការផ្គត់ផ្គង់ហ្គាស និងប្រព័ន្ធដឹកជញ្ជូនតាមផ្លូវគោក មិនមានការរំខានឡើយ ពោលគឺនៅតែបន្តដំណើរការជាធម្មតាទាំងស្រុង៕