សេតវិមាន៖ ចិននឹងទិញផលិតផលកសិកម្មអាម៉េរិកយ៉ាងហោចណាស់ ១៧ ពាន់លានដុល្លារជារៀងរាល់ឆ្នាំ

វ៉ាស៊ីនតោន៖ សេតវិមានបានបញ្ជាក់កាលពីថ្ងៃអាទិត្យថា ប្រទេសចិនបានប្តេជ្ញាចិត្តទិញផលិតផលកសិកម្មរបស់សហរដ្ឋអាម៉េរិកយ៉ាងហោចណាស់ ១៧ ពាន់លានដុល្លារនៅឆ្នាំ ២០២៦ ២០២៧ និង ២០២៨។ សេតវិមានអះអាងទៀតថាការប្តេជ្ញាចិត្តរបស់ចិននេះត្រូវបានធ្វើឡើងក្នុងអំឡុងពេលកិច្ចប្រជុំរវាងប្រធានាធិបតីអាម៉េរិក ដូណាល់ ត្រាំ និងប្រធានាធិបតីចិន ស៊ី ជីនពីង កាលពីសប្តាហ៍មុន។

បើតាមសេតវិមាន តួលេខ ១៧ ពាន់លានដុល្លារអាម៉េរិកមិនរាប់បញ្ចូលនៃចំនួនក្នុងការបញ្ជាទិញសណ្តែកសៀងដែលប្រទេសចិនបានធ្វើនៅក្នុងខែតុលា ឆ្នាំ ២០២៥ នោះទេ ហើយប្រទេសចិននឹងធ្វើការជាមួយនិយតកររបស់សហរដ្ឋអាម៉េរិកដើម្បីលុបចោលការផ្អាករោងចក្រសាច់គោរបស់សហរដ្ឋអាម៉េរិក និងបន្តការនាំចូលបសុបក្សីពីរដ្ឋអាម៉េរិកដែលត្រូវបានកំណត់ថាគ្មានជំងឺផ្តាសាយបក្សី។ សេតវិមានបានគូសបញ្ជាក់ទៀតថា ចិននិងអាម៉េរិកនឹងបង្កើតក្រុមប្រឹក្សាពាណិជ្ជកម្មសហរដ្ឋអាម៉េរិក-ចិន និងក្រុមប្រឹក្សាវិនិយោគសហរដ្ឋអាម៉េរិក-ចិន។

រដ្ឋមន្ត្រីការបរទេសចិន លោក វ៉ាង យី បានមានប្រសាសន៍នៅក្នុងសេចក្តីថ្លែងការណ៍មួយកាលពីសប្តាហ៍មុនថា ក្រុមប្រឹក្សាភិបាលនឹងដោះស្រាយកង្វល់អំពីការចូលទីផ្សារសម្រាប់ផលិតផលកសិកម្ម និងពង្រីកពាណិជ្ជកម្មក្រោមក្របខ័ណ្ឌកាត់បន្ថយពន្ធទៅវិញទៅមកជាមួយគ្នា។

គួររម្លឹកថាមានការថយចុះគួរឱ្យកត់សម្គាល់នៃការនាំចេញផលិតផលកសិកម្មរបស់សហរដ្ឋអាម៉េរិកទៅកាន់ប្រទេសចិន បន្ទាប់ពីពន្ធគយសងសឹកគ្នាកាលពីឆ្នាំមុនបានកាត់បន្ថយយ៉ាងខ្លាំងនូវពាណិជ្ជកម្ម ដែលបានធ្លាក់ចុះ ៦៥.៧ ភាគរយធៀបនឹងឆ្នាំមុនមកត្រឹម ៨.៤ ពាន់លានដុល្លារអាម៉េរិកនៅឆ្នាំ ២០២៥នេះបើយោងតាមទិន្នន័យរបស់ក្រសួងកសិកម្មសហរដ្ឋអាម៉េរិក។ ប្រទេសចិនបានកាត់បន្ថយការពឹងផ្អែករបស់ខ្លួនលើទំនិញកសិកម្មរបស់សហរដ្ឋអាម៉េរិកយ៉ាងខ្លាំងចាប់តាំងពីអាណត្តិដំបូងរបស់លោក ត្រាំ ដោយទទួលបានសណ្តែកសៀងប្រហែល ២០ ភាគរយពីសហរដ្ឋអាម៉េរិកនៅឆ្នាំ ២០២៤ មួយឆ្នាំមុនពេលលោកវិលត្រឡប់មកកាន់តំណែងវិញ ធ្លាក់ចុះពី ៤១ ភាគរយនៅឆ្នាំ ២០១៦៕