ឡាអេ៖ តុលាការព្រហ្មទណ្ឌអន្តរជាតិនៅព្រឹកថ្ងៃទី ១២ ខែ ឧសភានេះបានចេញដីកាចាប់ខ្លួនអតីតមេប៉ូលីសក្រុងដាវ៉ូសនិងបច្ចុប្បន្នលោកមានតួនាទីថ្មីជាសមាជិកព្រឹទ្ធសភានៃប្រទេសហ្វីលីពីន ពីបទឧក្រិដ្ឋកម្មប្រឆាំងនឹងមនុស្សជាតិដែលជាប់ទាក់ទងនឹងសង្គ្រាមប្រឆាំងគ្រឿងញៀនពីឆ្នាំ ២០១១-២០១៩ ក្រោមការដឹកនាំរបស់លោកអតីតប្រធានាធិបតីហ្វីលីពីនលោក រ៉ូឌ្រីហ្គោ ឌូធើតេ ដែលក្នុងសង្រ្គាមគ្រឿងញៀននោះមានមនុស្សចន្លោះពី ១ម៉ឺន ដល់ ៣ម៉ឺននាក់ត្រូវបានសម្លាប់។
យោងតាមការិយាល័យរដ្ឋអាជ្ញានៃតុលាការព្រហ្មទណ្ឌអន្តរជាតិបានប្រកាសស្វាគមន៍ចំពោះការសម្រេចរបស់អង្គជំនុំជម្រះមុនជំនុំជម្រះទី I ដើម្បីបើកដីកាចាប់ខ្លួនប្រឆាំងនឹងលោក Ronald Marapon Dela Rosa ដែលជាជនសង្ស័យម្នាក់ក្នុងសំណុំរឿងសង្រ្គាមគ្រឿងញៀននៅប្រទេសហ្វីលីពីន។ ដីកាចាប់ខ្លួនត្រូវបានបញ្ជូនទៅអាជ្ញាធរពាក់ព័ន្ធនៅក្នុងសាធារណរដ្ឋហ្វីលីពីន ដោយការសម្រេចនេះដំបូងឡើយត្រូវបានចេញជាសម្ងាត់នៅថ្ងៃទី ៧ ខែវិច្ឆិកា ឆ្នាំ ២០២៥ ប៉ុន្តែឥឡូវនេះទើបតែត្រូវបានផ្សព្វផ្សាយជាសាធារណៈប៉ុណ្ណោះ បន្ទាប់ពីមានការផ្លាស់ប្តូរព័ត៌មានក្នុងដីកាមួយចំនួន ។
បើតាម ICC ដោយផ្អែកលើភស្តុតាងដែលបង្ហាញដោយអង្គជំនុំជម្រះបានរកឃើញថាមានមូលដ្ឋានសមហេតុផលដើម្បីជឿថាលោក Dela Rosa អតីតនាយកប៉ូលីសក្រុង Davao និងក្រោយមកជាប្រធានប៉ូលីសជាតិហ្វីលីពីន (“PNP”) ទទួលខុសត្រូវចំពោះឧក្រិដ្ឋកម្មប្រឆាំងមនុស្សជាតិនៃឃាតកម្ម (មាត្រា 7(1)(a) នៃលក្ខន្តិកៈទីក្រុងរ៉ូម) តាមរយៈការចូលរួមរបស់លោកនៅក្នុងផែនការរួមមួយដែលមានរយៈពេលចាប់ពីថ្ងៃទី ១ ខែវិច្ឆិកា ឆ្នាំ ២០១១ រហូតដល់ថ្ងៃទី ១៦ ខែមីនា ឆ្នាំ ២០១៩ ដែលបានសម្លាប់ជនរងគ្រោះដែលត្រូវបានចោទប្រកាន់ជាច្រើននាក់ក្នុងសង្រ្គាមគ្រឿងញឿន។
អង្គជំនុំជម្រះបានរកឃើញមូលដ្ឋានសមហេតុផលដើម្បីជឿថាលោក Dela Rosa ទទួលខុសត្រូវរួមគ្នាជាមួយសហជនល្មើសផ្សេងទៀត រួមទាំងអតីតប្រធានាធិបតី ដូធើតេ ចំពោះឃាតកម្មនៅក្នុងប្រទេសហ្វីលីពីន រវាងយ៉ាងហោចណាស់ថ្ងៃទី ៣ ខែកក្កដា ឆ្នាំ ២០១៦ រហូតដល់ចុងខែមេសា ឆ្នាំ ២០១៨។ ដីកាចាប់ខ្លួនរបស់លោក Dela Rosa គឺជាជំហានដ៏សំខាន់មួយនៅក្នុងការបន្តស្វែងរកការទទួលខុសត្រូវរបស់ការិយាល័យចំពោះឧក្រិដ្ឋកម្មដែលត្រូវបានចោទប្រកាន់នៅក្នុងបរិបទនៃយុទ្ធនាការដែលគេហៅថា "សង្គ្រាមប្រឆាំងគ្រឿងញៀន" នៅក្នុងប្រទេសហ្វីលីពីន។ ការិយាល័យនឹងបន្តធ្វើការយ៉ាងជិតស្និទ្ធជាមួយការិយាល័យចុះបញ្ជី និងអ្នកពាក់ព័ន្ធទាំងអស់ ដើម្បីសម្រួលដល់ការអនុវត្តដីកាចាប់ខ្លួន៕
.jpg?1778645580)
