សិស្សវិទ្យាល័យព្រះមុនីវង្ស ២រូប នឹងចូលរួមកម្មសិក្សារយៈពេល ១៥ ថ្ងៃ នៅប្រទេសបារាំង

ភ្នំពេញ៖ សិស្សថ្នាក់ពីរភាសានៃវិទ្យាល័យព្រះមុនីវង្ស ចំនួន២រូប នឹងចេញដំណើរទៅប្រទេសបារាំង ក្នុងខែកក្កដា ឆ្នាំ២០២៦ ខាងមុខនេះ ដើម្បីចូលរួមកម្មសិក្សារយៈពេល ១៥ ថ្ងៃ នៅសាលា Alliance Française នៃទីក្រុង Vichy (Cavilam)។

យោងតាមគេហទំព័រ វិទ្យាស្ថានបារាំងកម្ពុជា ខេត្តបាត់ដំបង សិស្សវិទ្យាល័យទាំងពីររូប រួមមាន ខីឡុន ខេមរិន្ទនិង សែម រ៉ានីតបញ្ញា ត្រូវបានជ្រើសរើសក្នុងចំណោមសិស្សានុសិស្សនៃថ្នាក់ពីរភាសានៃវិទ្យាល័យព្រះមុនីវង្ស ដែលបានប្រលងជាប់សញ្ញាបត្រDELF B2 និងជាសិស្សនៅវិទ្យាស្ថានបារាំងកម្ពុជា ខេត្តបាត់ដំបងផងដែរ។ សិស្សទាំងពីររូបនឹងទៅធ្វើកម្មសិក្សានៅប្រទេសបារាំង ក្នុងខែកក្កដា ឆ្នាំ ២០២៦ នៅសាលា Cavilam (Alliance Française de Vichy)។

បើតាមវិទ្យាស្ថាន បានឱ្យដឹងថា សមិទ្ធផលនេះអាចសម្រេចទៅបានដោយសារវិទ្យាល័យព្រះមុនីវង្ស ទទួលបានស្លាកសញ្ញា «Label France Éducation» ដែលសបញ្ជាក់ពីគុណភាព និងលទ្ធផលសិក្សាយ៉ាងល្អប្រសើររបស់សិស្សក្នុងថ្នាក់ពីរភាសា ជាពិសេសគឺលទ្ធផលនៃការប្រឡងសញ្ញាបត្រ DELF៕