អាម៉េរិក៖ កម្ពុជា បានប្រកាសថ្កោលទោសយ៉ាងខ្លាំងចំពោះប្រទេសថៃ ចំពោះការឈ្លានពានម្តងហើយម្តងទៀត ដែលបណ្តាលឱ្យមានទុក្ខវេទនារបស់ប្រជាពលរដ្ឋ និងការបំផ្លិចបំផ្លាញសេដ្ឋកិច្ចកម្ពុជាយ៉ាងធ្ងន់ធ្ងរ។ ការប្រកាសនេះ ធ្វើឡើងដោយលោក ជូ ហេង អគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជា នៅវេទិកា ECOSOC នៃអង្គការសហប្រជាជាតិស្តីពីហិរញ្ញប្បទានសម្រាប់ការតាមដានការអភិវឌ្ឍន៍។
ក្នុងវេទិកា ECOSOC លោក ជូ ហេង បានគូសបញ្ជាក់ពីផលវិបាកធ្ងន់ធ្ងរនៃជម្លោះនេះ ដោយរាយការណ៍ពីការស្លាប់របស់ពលរដ្ឋជាង ១០០ នាក់ និងការផ្លាស់ទីលំនៅរបស់ជនស៊ីវិលជាង ៦៥០,០០០ នាក់។ ជនភៀសខ្លួនទាំងនេះ ប្រឈមមុខនឹងបញ្ហាប្រឈមធ្ងន់ធ្ងរ រួមទាំងការខូចខាតផ្ទះសម្បែង ការខ្វះខាតសេវាកម្ម និងការព្រួយបារម្ភអំពីសុវត្ថិភាព ខណៈសាលារៀន និងមណ្ឌលសុខភាពជាច្រើននៅតែបិទនៅក្នុងតំបន់ដែលរងផលប៉ះពាល់។
លោកអគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជា បានកំណត់លក្ខណៈស្ថានភាពនេះថាជា "បញ្ហាប្រឈមស្រួចស្រាវ និងកាន់តែធ្ងន់ធ្ងរ" ដោយបញ្ជាក់ថា បណ្តាលមកពីសកម្មភាពឈ្លានពានរបស់យោធាថៃជាបន្តបន្ទាប់ចាប់តាំងពីឆ្នាំ ២០២៥ ដែលបានរារាំងយ៉ាងធ្ងន់ធ្ងរដល់កិច្ចខិតខំប្រឹងប្រែងអភិវឌ្ឍន៍របស់ប្រទេសកម្ពុជា។
លោកបានស្នើសុំឱ្យសហគមន៍អន្តរជាតិទទួលស្គាល់ពីផលប៉ះពាល់នៃជម្លោះលើហិរញ្ញប្បទានអភិវឌ្ឍន៍ និងស្នើឱ្យបង្កើនលទ្ធភាពទទួលបានហិរញ្ញប្បទានសម្បទាន និងការបន្ធូរបន្ថយបំណុល។ លោក ជូ ហេង បានអំពាវនាវឱ្យមានការសហការគ្នា ដើម្បីកម្ពុជាអាចទទួលបានសន្តិភាព និងការអភិវឌ្ឍឡើងវិញ៕
