សៀវភៅ "The Father" បង្ហាញពី អំណាចទន់ របស់មេដឹកនាំកម្ពុជា ក្នុងមាគ៌ាសន្តិភាព កំពុងទាញភ្នែកមហាអំណាចព័ត៌មានអន្តរជាតិ ឱ្យងាកមកចុះផ្សាយ

ភ្នំពេញ៖សៀវភៅ "The Father Who Shielded and Never Left" គឺជាសៀវភៅបរិយាយពីជីវប្រវត្តិបែបយុទ្ធសាស្ត្ររបស់មេដឹកនាំកំពូលរបស់កម្ពុជា បង្ហាញពីយុទ្ធសាស្ត្រ «ឈ្នះ-ឈ្នះ» ក្នុងរូបភាពជា «ប្លង់មេសន្តិភាព» ហើយបាននិងកំពុងទាក់ទាញភ្នែកមហាអំណាចព័ត៌មានអន្តរជាតិឱ្យងាកមកចុះផ្សាយព្រពាត។សៀវភៅនេះ និពន្ធដោយលោកស្រី Fari មួយនេះ មិនមែនត្រឹមតែជានិទានរឿងរ៉ាវជីវិតនោះទេ ប៉ុន្តែវាបានបង្កប់នូវទម្ងន់យុទ្ធសាស្ត្រ និង អត្ថន័យនយោបាយដ៏សំខាន់ដែលពិភពលោកចង់បាន។

បណ្តាញផ្សព្វផ្សាយព័ត៌មានអន្តរជាតិជាច្រើន បានចាប់អារម្មណ៍ការចុះផ្សាយ សៀវភៅ "The Father Who Shielded and Never Left" ក្នុងទម្ងន់នៃយុទ្ធសាស្ត្រ «ស្ថាបត្យករសន្តិភាព» គឺការបង្ហាញពីយុទ្ធសាស្ត្រ «ឈ្នះ-ឈ្នះ» ក្នុងរូបភាពជា «ប្លង់មេសន្តិភាព»។ ក្នុងបរិបទដែលពិភពលោកបច្ចុប្បន្នកំពុងជាប់គាំងក្នុងជម្លោះអាវុធ និងការបែកបាក់ សៀវភៅនេះបានផ្ដល់នូវចម្លើយតាមរយៈបទពិសោធន៍ពិតរបស់សម្ដេចតេជោ ហ៊ុន សែន ក្នុងការរំលាយអង្គការចាត់តាំងខ្មែរក្រហម និងការបង្រួបបង្រួមជាតិដោយមិនប្រើគ្រាប់កាំភ្លើង។ នេះជាទម្ងន់នៃ «វិទ្យាសាស្ត្រនយោបាយ» ដែលអន្តរជាតិចាត់ទុកថាជាមេរៀនដឹកនាំកម្រិតខ្ពស់ ដែលគ្រប់ជាតិសាសន៍គួររៀនសូត្រតាម។

អត្ថន័យនៃពាក្យ «ខែលការពារ»សៀវភៅនេះ បានផ្ដល់និយមន័យថ្មីនៃភាពជាអ្នកដឹកនាំ គឺមិនមែនគ្រាន់តែជាការគ្រប់គ្រងអំណាច ប៉ុន្តែគឺជាការធ្វើខ្លួនជា «ខែលការពារ» (The Shield)។ អត្ថន័យនេះមានទម្ងន់មនោសញ្ចេតនាខ្ពស់បំផុត ដែលបង្ហាញពីមេដឹកនាំម្នាក់ដែលហ៊ានយកជីវិតធ្វើជាដើមទុន ឈរយ៉ាងរឹងមាំនៅចំពោះមុខគ្រោះថ្នាក់ ដើម្បីធានាសុវត្ថិភាពជូនប្រជាជន។ ស្មារតី «មិនដែលបោះបង់ចោល» (Never Left) ក្នុងកាលៈទេសៈដែលពិភពលោកបោះបង់កម្ពុជាចោលនាពេលនោះ គឺជាចំណុចដែលធ្វើឱ្យអ្នកអានបរទេសភ្ញាក់ផ្អើល និងស្ងើចសរសើរពីភក្តីភាពរវាងមេដឹកនាំ និងប្រជាជាតិ។

និរន្តរភាពនៃសន្តិភាព និងការបន្តវេន ទម្ងន់ចុងក្រោយដែលអន្តរជាតិឱ្យតម្លៃ គឺការមើលឃើញពីភាពរឹងមាំនៃ «គ្រឹះសន្តិភាព» ដែលបានចាក់ឫសយ៉ាងជ្រៅក្នុងសង្គមកម្ពុជា។ សៀវភៅនេះបានបង្ហាញថា សន្តិភាពដែលកម្ពុជាមានសព្វថ្ងៃ គឺជាមរតកដែលត្រូវបានផ្ទេរមកកាន់អ្នកបន្តវេនជំនាន់ក្រោយយ៉ាងមានប្រសិទ្ធភាព។ ការដឹកនាំរបស់សម្ដេចធិបតី ហ៊ុន ម៉ាណែត ដែលប្រកាន់ខ្ជាប់នូវគោលការណ៍ «សន្តិភាពជាអាទិភាព» ត្រូវបានអន្តរជាតិមើលឃើញថាជាការបន្តវេនដ៏ជោគជ័យ ដែលធានាថាកម្ពុជានឹងមិនត្រឡប់ទៅរកអតីតកាលដ៏ខ្មៅងងឹតវិញឡើយ។

សរុបមក សៀវភៅ "The Father Who Shielded and Never Left" មានអត្ថន័យលើសពីអក្សរសិល្ប៍ ព្រោះវាជា «អាវុធការទូតបែបនិទានរឿង» (Narrative Diplomacy) ដែលបានកែប្រែទស្សនៈពិភពលោកចំពោះកម្ពុជា។ វាមិនត្រឹមតែនាំយកប្រវត្តិសាស្ត្រខ្មែរទៅកាន់ឆាកអន្តរជាតិប៉ុណ្ណោះទេ ប៉ុន្តែថែមទាំងលើកកម្ពស់កិត្តិយស និងកេរ្តិ៍ឈ្មោះថ្នាក់ដឹកនាំកម្ពុជា ឱ្យក្លាយជាតួអង្គមេដឹកនាំសកលដែលពិភពលោកកោតសរសើរ និងផ្ដល់តម្លៃយ៉ាងខ្ពង់ខ្ពស់បំផុត៕