ភ្នំពេញ៖ ក្រសួងប្រៃសណីយ៍និងទូរគមនាគមន៍ សហការជាមួយស្ថាប័នពាក់ព័ន្ធ នឹងរៀបចំព្រឹត្តិការណ៍អបអរសាទរទិវាអន្តរជាតិ “ក្មេងស្រីក្នុងវិស័យបច្ចេកវិទ្យាគមនាគមន៍និងព័ត៌មាន ឆ្នាំ២០២៦ (International Girls in ICT Day 2026)” ក្រោមប្រធានបទ “ក្មេងស្រីចូលរួមបង្កើតបញ្ញាសិប្បនិម្មិតដើម្បីការអភិវឌ្ឍនៅកម្ពុជា” នាថ្ងៃទី២៥ មេសា ចូលរួមដោយសេរី ដើម្បីឱ្យយុវជន ជាពិសេសស្រ្តីចូលរួមសិក្សាស្វែងយល់ក្នុងវិស័យបច្ចេកវិទ្យា។
ក្នុងព្រឹត្តិការណ៍នេះ នឹងមានការបង្ហាញស្នាដៃពិតៗ ដោយអ្នកចូលរួមអាចចូលទស្សនាការធ្វើបទបង្ហាញអំពីការសរសេរកូដ (Coding) ដោយប្រើប្រាស់ AI ជាជំនួយការឆ្លាតវៃពីសំណាក់យុវតីឆ្នើម។ កិច្ចពិភាក្សាតុមូល៖ ជួបជាមួយវាគ្មិនជំនាញក្នុងប្រធានបទ “ស្ត្រីក្នុងវិស័យ AI” ដើម្បីស្វែងយល់ពីឱកាស និងអនាគតនៃបច្ចេកវិទ្យានៅកម្ពុជា។ បណ្តាញទំនាក់ទំនង៖ ជួបពិភាក្សា និងផ្លាស់ប្តូរបទពិសោធន៍ជាមួយអ្នកជំនាញ និងយុវជនដែលមានចំណូលចិត្តដូចគ្នា។
គួរបញ្ជាក់ថា កម្មវិធីនេះ នឹងប្រព្រឹត្តិទៅនៅថ្ងៃទី២៥ ខែមេសា ឆ្នាំ២០២៦ វេលាម៉ោង១៤:០០ នាទីរសៀល នៅសាលប្រជុំធំ ជាន់ទី៣ ទីស្តីការក្រសួងប្រៃសណីយ៍និងទូរគមនាគមន៍ ដោយបើកជូនសាធារណជនចូលរួមដោយសេរី។ សម្រាប់យុវជន ដែលមានចំណាប់អារម្មណ៍ សូមចុះឈ្មោះតាមរយៈ https://go.gov.kh/mptc/girlict៕
