ស្ថានទូតសិង្ហបុរី នឹងរៀបចំ “កម្មវិធីជំនួបយុវជន” ដើម្បីឱ្យយុវជនអាចពិភាក្សា និងរៀនពីគ្នាទៅវិញទៅមក

ភ្នំពេញ៖ ស្ថានទូតសិង្ហបុរីប្រចាំកម្ពុជា នឹងរៀបចំកម្មវិធីជំនួបយុវជនកម្ពុជានៅមជ្ឈមណ្ឌលសហប្រតិបត្តិការកម្ពុជា-សិង្ហបុរី។ ជំនួបយុវជននេះ នឹងធ្វើឡើងនៅថ្ងៃទី០៩ ខែឧសភា ឆ្នាំ២០២៦ ដើម្បីឱ្យយុវជនអាចលើកយកគំនិតរបស់ខ្លួនមកពិភាក្សា និងផ្លាស់ប្តូរបទពិសោធន៍ ព្រមទាំងបង្កើតទំនាក់ទំនងរវាងគ្នា។

យោងតាមគេហទំព័រផ្លូវការនៃស្ថានទូតសិង្ហបុរី កម្មវិធីជំនួបយុវជននេះគឺសម្រាប់យុវជនដែលមានចំណង់ចំណូលចិត្តនៅក្នុងការបង្កើតទំនាក់ទំនង រៀនសូត្រពីគ្នា និងការរួមចំណែកផ្សេងៗនៅក្នុងសហគមន៍។ នៅក្នុងជំនួបនេះ យុវជនអាចលើកយកទស្សនៈផ្ទាល់ខ្លួន និងរៀនសូត្រតាមរយៈការជជែក ស្តាប់រឿងរ៉ាវផ្សេងៗរបស់យុវជនដទៃទៀត និងវាគ្មិនដែលមានបទពិសោធន៍ដែលពួកគាត់នឹងចែករំលែកពីរឿងរ៉ាវ និងទស្សនៈរបស់ពួកគាត់។ បន្ថែមពីនេះ កម្មវិធីនឹងមានការរៀបចំអាហារពេលល្ងាច ដើម្បីឱ្យយុវជនអាចបង្កើតទំនាក់ទំនងជាមួយគ្នាផងដែរ។

គួរបញ្ជាក់ថា ជំនួបនេះនឹងពិភាក្សាជាភាសាអង់គ្លេស។ យុវជនមានចំណាប់អារម្មណ៍អាចដាក់ពាក្យតាម តំណភ្ជាប់ ឱ្យបានរួសរាន់ព្រោះចំនួនមានកំណត់។ កម្មវិធី នឹងធ្វើឡើងនៅថ្ងៃទី០៩ ខែឧសភា ឆ្នាំ២០២៦ ចាប់ពីម៉ោង៣រសៀល ដល់ម៉ោង៩យប់ នៅមជ្ឈមណ្ឌលសហប្រតិបត្តិការកម្ពុជា–សិង្ហបុរី៕