យុវតីឆ្នើម ៨០រូប នឹងចូលរួមក្នុងកម្មវិធី «សភាត្រាប់» នៅថ្ងៃស្អែក ដើម្បីជម្រុញស្រ្តីក្នុងវិស័យនយោបាយ

ភ្នំពេញ៖ យុវតីឆ្នើមប្រមាណ ៨០រូប មកពីទូទាំងប្រទេស នឹងចូលរួមក្នុងកម្មវិធី «សភាត្រាប់ (Mock Parliament)» នាថ្ងៃស្អែកនេះ ដើម្បី ស្វែងយល់ពីតួនាទី និងនីតិវិធីនៃស្ថាប័ននីតិប្បញ្ញត្តិ ពង្រឹងសមត្ថភាពជជែកដេញដោល និងភាពជាអ្នកដឹកនាំ និងជំរុញការចូលរួមរបស់ស្ត្រីក្នុងកិច្ចការនយោបាយ និងអភិវឌ្ឍន៍ជាតិ។

កម្មវិធី «សភាត្រាប់» ត្រូវបានរៀបចំឡើងដោយរដ្ឋសភាកម្ពុជា សហការជាមួយ អង្គការ UN Women និងអង្គការ UNFPA ក្នុងស្មារតីជំរុញយុវជនឱ្យក្លាយជាសសរស្តម្ភដ៏រឹងមាំសម្រាប់អនាគតជាតិ ដែលនឹងប្រារព្ធឡើងជាផ្លូវការ នាថ្ងៃទី២១-២២ ខែមេសា ឆ្នាំ២០២៦។

កម្មវិធីនេះ ត្រូវបានរៀបចំឡើងក្នុងកាលៈទេសៈចាំបាច់មួយ ខណៈដែលភាពជាតំណាងរបស់ស្ត្រីក្នុងវិស័យនយោបាយនៅមានកម្រិតនៅឡើយ។ បើទោះបីជាកម្ពុជាសម្រេចបាននូវវឌ្ឍនភាពគួរឱ្យកត់សម្គាល់លើគោលនយោបាយយេនឌ័រ ប៉ុន្តែយោងតាមទិន្នន័យក្រោយការបោះឆ្នោតឆ្នាំ២០២៣ អាសនៈស្ត្រីក្នុងរដ្ឋសភានិងនៅថ្នាក់ក្រោមជាតិមានការធ្លាក់ចុះ។ កត្តានេះបណ្តាលមកពីឧបសគ្គនៃផ្នត់គំនិតសង្គមដែលនៅតែបន្តរឹតត្បិតសមត្ថភាពស្ត្រី និងបន្ទុកការងារក្នុងគ្រួសារ ដែលរារាំងពួកគេពីការបញ្ចេញសក្តានុពលក្នុងតួនាទីជាអ្នកដឹកនាំ។

ក្នុងរយៈពេលនៃកម្មវិធី បេក្ខនារីនឹងត្រូវដើរតួជាសមាជិកសភា ដើម្បីសិក្សាពីយន្តការការងារជាក់ស្តែង របៀបរៀបចំតាក់តែងច្បាប់ ការពិភាក្សាដេញដោលលើបញ្ហាជាតិ និងការតស៊ូមតិប្រកបដោយវិជ្ជាជីវៈ។ អ្វីដែលកាន់តែពិសេសនោះ យុវតីនឹងមានឱកាសទទួលបានការណែនាំ និងការបង្ហាត់បង្ហាញដោយផ្ទាល់ពីសំណាក់សមាជិកាសភាស្ត្រី ដែលជាបទពិសោធន៍ដ៏កម្រក្នុងការតភ្ជាប់ទំនាក់ទំនងអន្តរជំនាន់។

គូរបញ្ជាក់ថា កម្មវិធី «សភាត្រាប់» ដែលមានរយៈពេលមួយថ្ងៃកន្លះនេះ នឹងប្រមូលផ្តុំយុវជន និងយុវនារីចំនួន ៨០រូប ដែលមានអាយុចន្លោះពី ១៨ ដល់ ២៥ឆ្នាំ មកពីគ្រប់រាជធានី-ខេត្តទាំង ២៥ ទូទាំងប្រទេសកម្ពុជា ដើម្បីមកសិក្សា និងអនុវត្តជាក់ស្តែងនូវតួនាទីជាសមាជិកសភា ក្នុងស្មារតីទទួលខុសត្រូវខ្ពស់ចំពោះសង្គមជាតិ៕