បាងកក៖ របាយការណ៍សរុបនៃគ្រោះថ្នាក់ចរាចរណ៍ក្នុងឱកាសបុណ្យសង្ក្រាន្តរយៈពេល ៧ ថ្ងៃនៅប្រទេសថៃ ដែលបានបញ្ចប់កាលពីថ្ងៃព្រហស្បតិ៍កន្លងទៅ បង្ហាញថាមានអ្នកបាត់បង់ជីវិតសរុបចំនួន ២៤២ នាក់។
យោងតាមការរាយការណ៍ពីកាសែតVN Express តួលេខនេះមានការថយចុះ ៩,៧% បើធៀបនឹងមធ្យមភាគក្នុងរយៈពេល ៣ ឆ្នាំចុងក្រោយ ខណៈដែលចំនួនគ្រោះថ្នាក់ចរាចរណ៍សរុបចាប់ពីថ្ងៃទី ១០ ដល់ ១៦ ខែមេសា មានចំនួន ១,២៤២ ករណី ដែលធ្លាក់ចុះដល់ទៅ ៣៥,៦% បើធៀបនឹងឆ្នាំមុន។ ទោះបីជាយ៉ាងណា ទីក្រុងបាងកកនៅតែជាតំបន់ដែលមានអត្រាអ្នកស្លាប់ខ្ពស់ជាងគេបំផុត ដោយមានចំនួនរហូតដល់ ២១ នាក់។
យោងតាមការបញ្ជាក់ពីអាជ្ញាធរថៃ មូលហេតុចម្បងដែលបង្កឱ្យមានគ្រោះថ្នាក់ក្នុងអំឡុងពេលនេះ គឺការបើកបរលើសល្បឿនកំណត់ (៤០,៦៥%) និងការបើកជែងក្នុងចម្ងាយកៀក (២៥,២០%)។
គួររំលឹកផងដែរថា អាជ្ញាធរថៃបានដាក់ឈ្មោះរយៈពេលនេះថាជា «៧ថ្ងៃគ្រោះថ្នាក់» អស់រយៈពេលប្រមាណមួយទសវត្សរ៍មកហើយ ដើម្បីដាស់តឿនដល់សាធារណជនអំពីហានិភ័យខ្ពស់នៃគ្រោះថ្នាក់ចរាចរណ៍ អំឡុងពេលដែលប្រជាជនសម្រុកទៅលេងស្រុកកំណើត និងការដើរកម្សាន្តក្នុងពិធីបុណ្យជះទឹក។
លទ្ធផលឆ្នាំ ២០២៦ នេះ បង្ហាញភាពវិជ្ជមានជាងឆ្នាំ ២០២៥ សម្រាប់ប្រទេសថៃ ដែលកាលនោះមានអ្នកស្លាប់រហូតដល់ ២៥៣ នាក់៕
