ស្ថានទូតអន្តរជាតិជាច្រើន ចេញសារថ្វាយព្រះពរព្រះមហាក្សត្រខ្មែរ ឆាប់ជាសះស្បើយពីព្រះរោគ

ភ្នំពេញ៖ ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី បានប្រទានព្រះរាជសារថា ព្រះអង្គទ្រង់មានព្រះរោគមហារីកនៅក្រពេញប្រូស្តាត។ក្រោយទទួលបានព័ត៌មាននេះ តំណាងស្ថានទូតបរទេសនានាប្រចាំនៅកម្ពុជា បានចេញសារថ្វាយព្រះពរព្រះអង្គមានព្រះរាជសុខភាពល្អបរិបូរណ៍ និងឆាប់ជាសះស្បើយពីព្រះរោគឡើង​វិញ។

តំណាងស្ថានទូតទាំងនោះមានជាអាទិ៍៖ចក្រភពអង់គ្លេស បារាំង សហភាពអឺរ៉ុប ជប៉ុន អូស្ត្រាលី កាណាដា សាធារណរដ្ឋឆែក​ និង តួកគី។ទូតអន្តរជាតិទាំងអស់នោះ បានចេញសារថ្វាយព្រះពរជាបន្តបន្តគ្នាដោយសង្ឃឹមថា ព្រះបាទសម្តេចព្រះបរមនាថ នរោត្តម សីហមុនី នឹងមានព្រះរាជសុខភាពល្អបរិបូរណ៍ ហើយឆាប់ជាសះស្បើយពីព្រះរោគឡើង​វិញ ដើម្បីបន្តគង់ប្រថាប់ជាម្លប់ដល់ប្រជារាស្ត្រខ្មែរទាំងមូល។​

គួរបញ្ជាក់ថា កាលពីថ្ងៃទី១០ ខែមេសា ឆ្នាំ២០២៦​ ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី បានប្រទានព្រះរាជសារថា មានព្រះរោគ«មហារីកនៅក្រពេញប្រូស្តាត»ដែលត្រូវគង់ប្រថាប់នៅមន្ទីរពេទ្យរដ្ឋធានីប៉េកាំងបន្តទៀត ហើយពុំទាន់អាចយាងនិវត្តន៍ទៅកាន់មាតុប្រទេសវិញបាន.

ព្រះ​មហាក្សាយ ​និង​សម្តេចព្រះមហាក្សត្រី ព្រះវររាជមាតាជាតិខ្មែរ ផ្ញើសេចក្តីនឹករលឹក និង​ សូម​​បួងសួងដល់គុណបុណ្យព្រះរតនត្រ័យ គុណបារមី វត្ថុស័ក្តិសិទ្ធិនានាក្នុងលោក និងទេវតាឆ្នាំថ្មី ប្រសិទ្ធពរជ័យ សិរីមង្គល បវរមហាប្រសើរ​ដល់​ប្រជាជនខ្មែរ​ទាំង​មូល​ឲ្យ​បាន​ប្រកបនូវសេចក្តីសុខ សេចក្តីចម្រើន ក្នុងឱកាសបុណ្យចូលឆ្នាំថ្មី៕