អាម៉េរិក៖ រដ្ឋមន្ត្រីក្រសួងការពារជាតិសហរដ្ឋអាម៉េរិកលោក ភីត ហេកសេត (Pete Hegseth) បានស្នើសុំឱ្យនាយសេនាធិការកងទ័ពឧត្តមសេនីយ៍ Randy George ចុះចេញពីតំណែង ហើយចូលនិវត្តន៍ភ្លាមៗ ចំពេលដែលសង្រ្គាមអាម៉េរិកលើអ៊ីរ៉ង់ឈានចូលដល់ថ្ងៃទី ៣៤។ CBS News រាយការណ៍ថា លោក ហេកសេត ចង់បាននរណាម្នាក់ថ្មីដែលអាចអនុវត្តចក្ខុវិស័យរបស់លោកប្រធានាធិបតី ត្រាំ បាន។
អ្នកនាំពាក្យរបស់មន្ទីរបញ្ចកោណលោក Sean Parnell បានប្រកាសក្នុងសេចក្តីថ្លែងការណ៍មួយថាលោក George នឹងចូលនិវត្តន៍ពីតំណែងរបស់លោកជានាយសេនាធិការទី ៤១ នៃកងទ័ពសហរដ្ឋអាម៉េរិកដែលនេះនឹងមានប្រសិទ្ធភាពភ្លាមៗ។ ក្រសួងសង្គ្រាមអាម៉េរិកក៏បានបង្ហាញការដឹងគុណចំពោះការបម្រើប្រទេសជាតិរបស់លោកអស់រយៈពេលជាច្រើនទសវត្សរ៍របស់ឧត្តមសេនីយ៍ George។
មន្ត្រីជាន់ខ្ពស់ក្រសួងការពារជាតិម្នាក់បានប្រាប់ CBS News ថា "យើងមានការដឹងគុណចំពោះការបម្រើរបស់គាត់ ប៉ុន្តែវាដល់ពេលសម្រាប់ការផ្លាស់ប្តូរអ្នកដឹកនាំនៅក្នុងកងទ័ពហើយ"។ យោងតាមប្រភពបីដែលស្គាល់ពីបញ្ហានេះ មន្ត្រីកងទ័ពពីរនាក់ផ្សេងទៀតត្រូវបានដកចេញពីតួនាទីរបស់ខ្លួនរួមមាន ឧត្តមសេនីយ៍ David Hodne ដែលជាអ្នកដឹកនាំបញ្ជាការផ្លាស់ប្តូរ និងបណ្តុះបណ្តាលកងទ័ព និងឧត្តមសេនីយ៍ William Green ដែលជាអ្នកដឹកនាំក្រុម Chaplain Corps របស់កងទ័ព។
គួររម្លឹកថាលោក Randy George ធ្លាប់បានបម្រើការជាជំនួយការយោធាជាន់ខ្ពស់របស់អតីតរដ្ឋមន្ត្រីក្រសួងការពារជាតិអាម៉េរិកចាស់ Lloyd Austin ពីឆ្នាំ ២០២១ ដល់ឆ្នាំ ២០២២ ក្នុងអំឡុងពេលរដ្ឋបាលលោក Biden បន្ទាប់ពីបម្រើការអស់រយៈពេលជាច្រើនទសវត្សរ៍។ ជាមន្ត្រីថ្មើរជើងអាជីព និងជានិស្សិតបញ្ចប់ការសិក្សានៅ West Point លោក George បានបម្រើការជាលើកដំបូងនៅក្នុងសង្គ្រាមឈូងសមុទ្រលើកទីមួយ និងជម្លោះថ្មីៗនៅអ៊ីរ៉ាក់ និងអាហ្វហ្គានីស្ថាន។ ប្រធានសេនាធិការកងទ័ពជាធម្មតាបម្រើការរយៈពេលបួនឆ្នាំ។ លោក George ត្រូវបានតែងតាំងសម្រាប់តំណែងនេះដោយប្រធានាធិបតី Joe Biden និងត្រូវបានបញ្ជាក់ដោយព្រឹទ្ធសភាក្នុងឆ្នាំ ២០២៣ មានន័យថាលោកជាធម្មតានឹងកាន់តំណែងនេះរហូតដល់ឆ្នាំ ២០២៧ ទើបចប់អាណត្តិរបស់លោក។
លោក Pete Hegseth គឺជាអតីតពិធីករទូរទស្សន៍ Fox News និងជាអតីតនាយទាហានដែលធ្លាប់ឆ្លងកាត់សមរភូមិនៅអាហ្វហ្គានីស្ថាន និងអ៊ីរ៉ាក់។ លោកត្រូវបានប្រធានាធិបតី ដូណាល់ ត្រាំ ជ្រើសរើសឱ្យមកដឹកនាំមន្ទីរបញ្ចកោណនៅដើមឆ្នាំ២០២៦នេះ ក្នុងបំណងរុះរើជួរថ្នាក់ដឹកនាំយោធាជាន់ខ្ពស់ និងកែប្រែរចនាសម្ព័ន្ធការពារជាតិអាម៉េរិក ឱ្យស្របតាមទិសដៅនយោបាយថ្មីរបស់រដ្ឋាភិបាលលោកត្រាំ៕
