ចិន៖ សភាតំណាងប្រជាជនចិន (NPC) កាលពីថ្ងៃព្រហស្បតិ៍ បានអនុម័តច្បាប់ថ្មីមួយមានឈ្មោះថា «ការលើកកម្ពស់សាមគ្គីភាព និង វឌ្ឍនភាពជាតិ»។ច្បាប់នេះ មានគោលបំណងជំរុញសមាហរណកម្មរវាងក្រុមជនជាតិទាំង ៥៦ របស់ចិន និង បង្កើនឱកាសការងារ តាមរយៈការកំណត់ឱ្យកុមារទាំងអស់រៀនភាសាចិនមង់ដារីន (Mandarin) ចាប់ពីកម្រិតមត្តេយ្យរហូតដល់វិទ្យាល័យ។ច្បាប់នេះ ក៏បានកំណត់មូលដ្ឋានគតិយុត្តក្នុងការដាក់ទោសទណ្ឌលើមាតាបិតាណាដែលបណ្ដុះគំនិត «អវិជ្ជមាន» ដល់កូនៗ អាចប៉ះពាល់ដល់សុខដុមរមនាជាតិ។
យោងតាមប្រព័ន្ធផ្សព្វផ្សាយរដ្ឋចិន ច្បាប់នេះអាចត្រូវបានយកមកអនុវត្តសូម្បីតែនៅក្រៅព្រំដែននៃប្រទេសចិន មានន័យថា បុគ្គលទាំងឡាយណាដែលរស់នៅក្រៅប្រទេសចិន ហើយត្រូវបានរកឃើញថាបាន «ធ្វើសកម្មភាពដែលបង្កការអន្តរាយដល់សាមគ្គីភាពជាតិ» ឬ «ញុះញង់ឱ្យមានការបំបែកខ្លួននៃក្រុមជនជាតិ» ក៏អាចត្រូវបានចោទប្រកាន់ និង ទទួលខុសត្រូវចំពោះមុខច្បាប់របស់ចិន។
ទោះជាយ៉ាងណាក៏ដោយ អ្នករិះគន់ និងអ្នកជំនាញអន្តរជាតិបានលើកឡើងថា ច្បាប់នេះគឺជាផ្នែកមួយនៃយុទ្ធសាស្ត្រ «ការធ្វើសីហនីយកម្ម» ដើម្បីរំលាយអត្តសញ្ញាណជនជាតិភាគតិចឱ្យចូលទៅក្នុងវប្បធម៌ហាន (Han) ដែលជាក្រុមជនជាតិភាគច្រើនលើសលប់។
យោងតាមទិន្នន័យផ្លូវការ ប្រទេសចិនមានក្រុមជនជាតិចំនួន ៥៦ ដែលក្នុងនោះជនជាតិ ហាន មានចំនួនប្រមាណ ៩១,១% (ជិត ១,៣ ប៊ីលាននាក់) នៃប្រជាជនសរុប ខណៈដែលក្រុមជនជាតិភាគតិចទាំង ៥៥ ផ្សេងទៀត មានចំនួនសរុបប្រមាណ ៨,៩% (ប្រហែល ១២៥ លាននាក់)។
