ស្វាយរៀង៖ អនុគម្រោងសាងសង់ទីលានទុកដាក់សំរាមប្រកបដោយអនាម័យនៅក្រុងបាវិត បាននបញ្ចប់ការងារសាងសង់ទាំងស្រុង និងរួចរាល់១០០% កាលពីចុងឆ្នាំ២០២៥ថ្មីៗនេះ។អនុគម្រោងសាងសង់ទីលានទុកដាក់សំរាមក្រុងបាវិត មានសមត្ថភាពស្តុកសំរាបបាន ៦៣២ ៧៨៤ ម៉ែត្រគូប។នេះបើយោងតាមលោក ផន រឹម អ្នកនាំពាក្យក្រសួងសារធាណការ និងដឹកជញ្ជូន។
អនុគម្រោងសាងសង់ទីលានទុកដាក់សំរាមក្រុងបាវិត សាងសង់នេះមានផ្ទៃដីទំហំ ២១ ហិកតា ស្ថិតនៅភូមិច្រកម្ទេស សង្កាត់ច្រកម្ទេស ក្រុងបាវិត ខេត្តស្វាយរៀង បានប្រារព្ធបើកការដ្ឋានការកាលពីព្រឹកថ្ងៃទី៣១ ខែមករា ឆ្នាំ២០២៥។គម្រោងបែងចែកដីប្រើប្រាស់ជា ២ផ្នែកធំៗ។ផ្នែកទី១. សាងសង់រណ្តៅចាក់សំរាមចំនួន៥ រណ្តៅ និងប្រព័ន្ធគ្រប់គ្រងទឹកកខ្វក់ចេញពីសំណល់ ។ផ្នែកទី២. សាងសង់ប៉ុស្តិសន្តិសុខ និងស្លាកសញ្ញាគម្រោង ធុងស្តុកសំណល់រាវនិង ស្ពានថ្លឹងទម្ងន់ និងការិយាល័យ ផ្លូវចូលទីតាំងគម្រោង និងផ្លូវក្នុងទីតាំងគម្រោង ប្រព័ន្ធលូបង្ហូរ អណ្តូងត្រួតពិនិត្យគុណភាពទឹក កន្លែងចំណត កន្លែងចែកចាយ និងផ្គត់ផ្គង់អគ្គិសនី អគាររដ្ឋបាល កន្លែងទទួលអាហារ និងកន្លែងសម្រាក កន្លែងញែកសំរាម កន្លែងរៀបចំធ្វើជីកំប៉ុស ធុងទឹកភ្លៀង កន្លែងផលិតហ្គាស ស្រះទឹកភ្លៀង ទីកន្លែងបន្ថែមសម្រាប់ទីលានញែកសំរាម កន្លែងសម្អាតរថយន្ត របង និងសួនច្បារដែលមានដាំដើមឈើជាដើម។
ការអនុវត្តនៃគម្រោងខាងលើនេះ នឹងបានចូលរួមលើកកម្ពស់សោភណភាពក្រុងបាវិត ក្នុងការប្រកួតប្រជែងទីក្រុងស្អាត ដោយប្រែក្លាយទីក្រុងទៅជាមជ្ឈមណ្ឌលសេដ្ឋកិច្ចតាមរយៈកែលម្អហេដ្ឋារចនាសម្ព័ន្ធបរិស្ថានក្រុង និងពង្រឹងសមត្ថភាពស្ថាប័នរបស់អាជ្ញាធរខេត្ត និងមូលដ្ឋាន៕
.jpg?1778143461)
