ទារកម្នាក់អាយុទើបតែ ១៣ថ្ងៃ ត្រូវពស់ចឹក ត្រូវបានគ្រូពេទ្យមន្ទីរពេទ្យគន្ធបុប្ផាសៀមរាប ព្យាបាលជាសះស្បើយ

សៀមរាប៖ គ្រូពេទ្យមន្ទីរពេទ្យគន្ធបុប្ផាសៀមរាប បានព្យាបាលទារកម្នាក់អាយុទើបតែ ១៣ថ្ងៃ ដែលត្រូវពស់ហនុមាន (Green Pit Viper) ចឹក ព្យាបាលបានដោយជោគជ័យ។ ពស់នេះ ជាប្រភេទមានគ្រោះថ្នាក់ខ្លាំង ប្រសិនបើមិនត្រូវបានរកឃើញ និងព្យាបាលទាន់ពេលវេលា វាអាចបណ្តាលឱ្យមានផលវិបាកធ្ងន់ និងអាចឈានដល់ការស្លាប់។ ក្រោយពីទទួលបានការព្យាបាលពីគ្រូពេទ្យ ប្រមាណរយៈពេល៣ថ្ងៃប៉ុណ្ណោះ ទារកមានស្ថានភាពប្រសើរ និងអាចត្រឡប់ទៅផ្ទះបាន។

បើតាមមន្ទីរពេទ្យគន្ធបុប្ផាសៀមរាប បានបញ្ជាក់ថា ទារកប្រុសម្នាក់បានពស់ហនុមាន (Green Pit Viper) ចឹកចំតំបន់ក្បាល នៅផ្ទះ វេលាម៉ោង៨យប់ថ្ងៃទី ១៥ ខែកញ្ញា ឆ្នាំ២០២៦ មានអាសយដ្ឋាននៅភូមិចាន់គីរី ឃុំចាន់គីរី ក្រុងប៉ោយប៉ែត ខេត្តបន្ទាយមានជ័យ។ បន្ទាប់ពីពស់ចឹក ទារកមាន ការហើម និងហូរឈាមនៅកន្លែងរបួស។ ក្រុមគ្រួសារបានប្រញាប់ប្រញាល់បញ្ជូនទារកមកកាន់ មន្ទីរពេទ្យជ័យវរ្ម័នទី៧ នៅវេលាម៉ោង ១:៣០ នាទីរំលងអធ្រាត្រ ថ្ងៃទី១៦ ខែកញ្ញា។

នៅទីនេះ ក្រុមគ្រូពេទ្យ និងគិលានុបដ្ឋាកបានចាប់ផ្តើមព្យាបាល និងតាមដានយ៉ាងយកចិត្តទុកដាក់។ ទារកបានទទួល ថ្នាំប្រឆាំងពិសពស់ សរុបចំនួន ៦ដូស ព្រមទាំងការថែទាំ និងតាមដានជាបន្តបន្ទាប់នៅក្នុងសាលសង្គ្រោះទារក NICU។ ត្រឹមតែ ២ថ្ងៃបន្ទាប់មក នៅព្រឹកថ្ងៃទី ១៨ ខែកញ្ញា ឆ្នាំ២០២៦ ម៉ោង ៩:០០ ស្ថានភាពទារកមានភាពប្រសើរឡើង ទារកមានសុខភាពល្អ និងអាចត្រឡប់ទៅផ្ទះបាន។

គួរបញ្ជាក់ថា ពិសរបស់ពស់ហនុមាន (Green Pit Viper) បង្កឱ្យមានផលប៉ះពាល់ដល់ប្រព័ន្ធកកឈាម ប្លាកែត និងសរសៃឈាម។ វាអាចបណ្តាលឱ្យមានវិបត្តិកំណកឈាមធ្ងន់ធ្ងរ ការថយចុះនៃចំនួនប្លាកែត និងការហូរឈាមដែលអាចគំរាមកំហែងដល់អាយុជីវិត។ ប្រសិនបើមិនត្រូវបានរកឃើញ និងព្យាបាលទាន់ពេលវេលា ជាពិសេសដោយការផ្តល់ថ្នាំប្រឆាំងពិសពស់ឱ្យបានសមស្រប វាអាចបណ្តាលឱ្យមានផលវិបាកធ្ងន់ និងអាចឈានដល់ការស្លាប់៕