ចិន៖ ប្រមុខរដ្ឋចិនលោក ស៊ីជីន ពីង បានរម្លឹកលោកប្រធានាធិបតីកូរ៉េខាងត្បូង លី ជេម្យុង អំពីប្រវត្តិសាស្រ្តកន្លងមក ហើយលោកស៊ីបានជំរុញឱ្យកូរ៉េខាងត្បូងជ្រើសរើសយុទ្ធសាស្ត្រឱ្យបានត្រឹមត្រូវ និងឈរលើភាពរឹងមាំរបស់ខ្លួន។លោកស៊ីបញ្ជាក់ទៀតថាក្នុងរយៈពេលត្រឹមតែពីរខែប៉ុណ្ណោះ យើងបានជួបគ្នាពីរដង និងបានផ្លាស់ប្តូរដំណើរទស្សនកិច្ចគ្នាទៅវិញទៅមក ដែលបង្ហាញថាភាគីទាំងពីរយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងចិន-កូរ៉េខាងត្បូង។ សព្វថ្ងៃនេះ ការផ្លាស់ប្តូរដែលមិនធ្លាប់មានក្នុងរយៈពេលមួយសតវត្សរ៍កំពុងកើតឡើងក្នុងល្បឿនលឿនជាងមុន។ ប្រទេសចិន និងសាធារណរដ្ឋកូរ៉េ ទទួលខុសត្រូវយ៉ាងសំខាន់ក្នុងការរក្សាសន្តិភាពក្នុងតំបន់ និងលើកកម្ពស់ការអភិវឌ្ឍសកល ព្រមទាំងចែករំលែកផលប្រយោជន៍រួមជាច្រើន។ យើងគួរតែឈរយ៉ាងរឹងមាំនៅផ្នែកត្រឹមត្រូវនៃប្រវត្តិសាស្ត្រ និងធ្វើការជ្រើសរើសយុទ្ធសាស្ត្រឱ្យបានត្រឹមត្រូវ។
សម្រាប់លោកស៊ី ប្រទេសចិនតែងតែដាក់ទំនាក់ទំនងជាមួយកូរ៉េខាងត្បូងខ្ពស់នៅក្នុងរបៀបវារៈការទូតក្នុងតំបន់របស់ខ្លួន និងរក្សាបាននូវនិរន្តរភាព និងស្ថិរភាពនៅក្នុងគោលនយោបាយរបស់ខ្លួនចំពោះកូរ៉េខាងត្បូង ហើយប្រទេសចិនមានឆន្ទៈក្នុងការធ្វើការជាមួយកូរ៉េខាងត្បូង ដើម្បីគាំទ្រយ៉ាងរឹងមាំនូវទិសដៅនៃកិច្ចសហប្រតិបត្តិការមិត្តភាព ប្រកាន់ខ្ជាប់នូវគោលការណ៍នៃផលប្រយោជន៍ទៅវិញទៅមក និងលទ្ធផលឈ្នះ-ឈ្នះ លើកកម្ពស់ភាពជាដៃគូយុទ្ធសាស្ត្រទ្វេភាគី លើកកម្ពស់សុខុមាលភាពរបស់ប្រជាជនទាំងពីរប្រកបដោយប្រសិទ្ធភាព និងរួមចំណែកជាវិជ្ជមានដល់សន្តិភាព និងការអភិវឌ្ឍក្នុងតំបន់ និងពិភពលោក។
លោក ស៊ី បានមានប្រសាសន៍ទៀតថា ប្រទេសចិន និងសាធារណរដ្ឋកូរ៉េ មានទំនាក់ទំនងសេដ្ឋកិច្ចជិតស្និទ្ធជាមួយឧស្សាហកម្ម និងខ្សែសង្វាក់ផ្គត់ផ្គង់ ដែលជាប់ទាក់ទងគ្នាយ៉ាងជ្រៅ ហើយកិច្ចសហប្រតិបត្តិការទ្វេភាគីនេះ ផ្តល់ផលប្រយោជន៍ទៅវិញទៅមក។
ជាការឆ្លើយតបលោក លី បានប្រាប់លោកស៊ីថាសាធារណរដ្ឋកូរ៉េ និងប្រទេសចិន គឺជាប្រទេសជិតខាងជិតស្និទ្ធ ដែលមានទំនាក់ទំនងយូរអង្វែង ប្រទេសទាំងពីរបានឈរជាមួយគ្នាប្រឆាំងនឹងការឈ្លានពានរបស់យោធានិយមជប៉ុន ហើយភាគីសាធារណរដ្ឋកូរ៉េ កោតសរសើរចំពោះការការពាររបស់ប្រទេសចិនចំពោះទីតាំងចាស់ៗនៃចលនាឯករាជ្យកូរ៉េនៅក្នុងប្រទេសចិន។
លោក លី បន្តថាចាប់តាំងពីការបង្កើតទំនាក់ទំនងការទូតមក ប្រទេសទាំងពីរបានជំរុញទំនាក់ទំនងសហប្រតិបត្តិការយ៉ាងជិតស្និទ្ធជាមួយនឹងលទ្ធផលផ្លែផ្កាហើយកូរ៉េ យកចិត្តទុកដាក់យ៉ាងខ្លាំងចំពោះទំនាក់ទំនងជាមួយប្រទេសចិន៕
