សៀមរាប៖ យុវជនបីក្រុម មកពីខេត្តកំពង់ចាម កំពង់ឆ្នាំង និង ខេត្តកណ្តាល បានជ័យលាភី ក្នុងកម្មវិធីប្រកួតប្រជែងស្នាដៃយុវជនសតវត្សរ៍ទី២១ ឆ្នាំ២០២៥ ក្រោមប្រធានបទ៖ “ការផលិតរ៉ូបូតសម្រាប់ប្រើប្រាស់ក្នុងការអភិវឌ្ឍសាលារៀន” បន្ទាប់ពីឆ្លងកាត់ការប្រកួតប្រជែងស្នាដៃដ៏ស្វិតស្វាញជាមួយក្រុមយុវជន STEM មកពី ២៥ រាជធានី ខេត្ត លើការតាំងពិព័រណ៍បង្ហាញស្នាដៃគម្រោង និងការធ្វើបទបង្ហាញ អស់រយៈពេល ០៣ថ្ងៃ នៅខេត្តសៀមរាប។
យោងតាមគេហទំព័រក្រសួងអប់រំ បានឱ្យដឹងថា បន្ទាប់ពីឆ្លងកាត់ការប្រកួតប្រជែងស្នាដៃដ៏ស្វិតស្វាញរបស់ក្រុមយុវជន STEM មកពី ២៥ រាជធានី ខេត្ត លើការតាំងពិព័រណ៍បង្ហាញស្នាដៃគម្រោង និងការធ្វើបទបង្ហាញ អស់រយៈពេល ០៣ថ្ងៃ កម្មវិធីបានរកឃើញម្ចាស់ជ័យលាភី ប្រចាំឆ្នាំ២០២៥ ដូចខាងក្រោម៖
⁃ជ័យលាភីលេខ១៖ ក្រុមយុវជន STEM មកពីវិទ្យាល័យ ហ៊ុន សែន កំពង់ចាម ខេត្តកំពង់ចាម គម្រោង៖ សាលារៀនឆ្លាតវៃ (Smart School)
⁃ជ័យលាភីលេខ២ ៖ ក្រុមយុវជន STEM មកពីវិទ្យាល័យ ហ៊ុន សែន រលាប្អៀរ ខេត្តកំពង់ឆ្នាំង គម្រោង៖ ម៉ម៉បត/ MOO MOO BOT (2M-B)
⁃ជ័យលាភីលេខ៣៖ ក្រុមយុវជន STEM មកពីវិទ្យាល័យ សម្ដេចអគ្គមហាធម្មពោធិសាល ជា ស៊ីម ព្រែកអញ្ចាញ ខេត្តកណ្ដាល គម្រោង៖ រ៉ូបូតកាត់ស្មៅ (Lawn Mower)។
គួរបញ្ជាក់ថា ពិធីបិទការប្រកួតវគ្គផ្ដាច់ព្រ័ត្រ នៃកម្មវិធីប្រកួតប្រជែងស្នាដៃយុវជនសតវត្សរ៍ទី២១ ឆ្នាំ២០២៥ ត្រូវបានចូលរួមពីនាយកដ្ឋានអប់រំយុវជននិងកុមារ លោក សេរី ជំនះ រដ្ឋលេខាធិការ ក្រសួងអប់រំ និងមានការចូលរួមពីថ្នាក់ដឹកនាំមន្ទីរអបរំ យុវជន និងកីឡា រាជធានីខេត្ត លោកគ្រូ អ្នកគ្រូ និងប្រតិភូយុវជន សរុបចំនួន២៨០នាក់៕
