ភ្នំពេញ៖ ធនាគារជាតិនៃកម្ពុជា កាលពីថ្ងៃទី១៥ ខែវិច្ឆិកា ឆ្នាំ២០២៥ បានរៀបចំវគ្គបណ្តុះបណ្តាលលើជំនាញមូលដ្ឋានគ្រឹះនៃការសរសេរកូដ (Computer Programming) ជូនដល់សិស្សានុសិស្ស សរុបចំនួន ១.២០០រូប មកពីវិទ្យាល័យកំពង់ថ្ម វិទ្យាល័យតាំងក្រសាំង វិទ្យាល័យហ៊ុនសែនភ្នំសន្ទុក និងអនុវិទ្យាល័យព្នៅ ក្នុងស្រុកសន្ទុក ខេត្តកំពង់ធំ។
យោងតាមគេហទំព័រធនាគារជាតិ បានឱ្យដឹងថា វគ្គបណ្តុះបណ្តាលនេះនឹងបន្តរៀបចំជាប្រចាំដោយមានគ្រូបង្គោលជាក្រុមការងារជំនាញផ្នែកបច្ចេកវិទ្យារបស់ប្រព័ន្ធទូទាត់បាគង ក្នុងគោលបំណងពង្រឹងមូលដ្ឋានគ្រឹះក្នុងវិស័យបច្ចេកវិទ្យាដល់សិស្សានុសិស្ស សំដៅឈានទៅចាប់យកជំនាញកម្រិតខ្ពស់ ក៏ដូចជាអាជីពការងារនាពេលអនាគត។
លោកស្រី ជា សិរី ទេសាភិបាលនៃធនាគារជាតិកម្ពុជា បានចែករំលែកដោយភ្ជាប់ជាមួយសារអំពាវនាវថា «ខ្ញុំសូមលើកទឹកចិត្តយ៉ាងឱ្យក្រុមហ៊ុននានាបរិច្ចាគកុំព្យូទ័រដែលលែងប្រើប្រាស់ ដល់សាលារៀននៅតាមខេត្ត និងជំនាញដើម្បីបង្រៀនគ្រូបណ្តុះបណ្តាល។ កុមារខ្លះមិនធ្លាប់ឃើញកុំព្យូទ័រពីមុនមកទេ ដូច្នេះការចូលរួមចំណែករបស់អ្នកសុទ្ធតែអាចត្រួសត្រាយផ្លូវធ្វើឱ្យកុមារទាំងនោះមានក្តីស្រមៃកាន់តែខ្ពស់»៕
