ភ្នំពេញ៖ «ពិព័រណ៍សិក្សានៅអឺរ៉ុបឆ្នាំ ២០២៥» នឹងប្រព្រឹត្តទៅនៅថ្ងៃទី១២ ខែវិច្ឆិកា ឆ្នាំ២០២៥ ដោយអនុញ្ញាតឱ្យសាធារណជនចូលរួមដោយសេរី និងឥតគិតថ្លៃ នៅសាលបុរីកោះពេជ្រ។ កម្មវិធីនឹងមានសាកលវិទ្យាល័យពីអឺរ៉ុបដល់ទៅ ៥០សាលាចូលរួម ដែលសិស្សអាចសួរព័ត៌មានពីសាកលវិទ្យាល័យ និងឱកាសអាហារូបករណ៍នានាដើម្បីសិក្សានៅអឺរ៉ុប។
យោងតាមគេហទំព័រ European Union in Cambodia បានឱ្យដឹងថា តាមរយៈការចូលរួមកម្មវិធីពិព័រណ៍នេះ សិស្សានុសិស្សនឹងបានជួបជាមួយសាកលវិទ្យាល័យកំពូលៗនៅអឺរ៉ុប ស្វែងរកអាហារូបករណ៍ និងស្វែងរកពិភពនៃឱកាសសិក្សា ទាំងអស់នៅកន្លែងតែមួយ។ កម្មវិធីនឹងចាប់ផ្តើមនៅម៉ោង ៤រសៀល ដល់ម៉ោង ៨យប់ នៅថ្ងៃទី ១២ ខែវិច្ឆិកា ឆ្នាំ២០២៥។ ដើម្បីចុះឈ្មោះចូលរួម សិស្សត្រូវបំពេញព័ត៌មានតាមរយៈតំណភ្ជាប់៖ www.studyineuropekh.com ។
គួរបញ្ជាក់ថា សិស្សនឹងអាចស្វែងយល់ព័ត៌មានបន្ថែមពី អាហារូបករណ៍ European Global Gateway, កម្មវិធី EIT Digital Double Degrees, ការសិក្សានៅប្រទេសបារាំង អ៊ីតាលី អាឡឺម៉ង់ អៀរឡង់ ហ្វាំងឡង់ សាធារណរដ្ឋឆេក ហុងគ្រី អាហារូបករណ៍ Erasmus+ ទៅអឺរ៉ុប ព្រមទាំងឱកាសសិក្សាថ្នាក់បណ្ឌិត Horizon Europe: PHD៕
