ភ្នំពេញ៖ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ២៨ សីហា ២០២៥ មានបេក្ខជនប្រឡងជាប់សរុប ១២២,៤៧៣នាក់ ត្រូវជា៨៤.៥៦ភាគរយ នៃចំនួនបេក្ខជនមកប្រឡង និង មានជាប់និទ្ទេស A ចំនួន៣,០០៣នាក់។
យោងតាមគេហទំព័រក្រសួងអប់រំ បានឱ្យដឹងថា បេក្ខជនប្រឡងបាក់ឌុប ឆ្នាំ២០២៥នេះ មានជាប់និទ្ទេស A ចំនួន៣,០០៣នាក់, ជាប់និទ្ទេស B ចំនួន៩,៩០១នាក់, ជាប់និទ្ទេស C ចំនួន២៨,៨០១នាក់, ជាប់និទ្ទេស D ចំនួន៤៥,៨៥៩នាក់ និងជាប់និទ្ទេស E ចំនួន ៣៤,៩០៩នាក់។
លទ្ធផលនៃការប្រឡងមធ្យមសិក្សាទុតិយភូមិ នៅទូទាំងប្រទេស នឹងត្រូវបានប្រកាសទាំងតាមគេហទំព័រហ្វេសប៊ុកក្រសួងអប់រំ និងប្រកាសនៅតាមមណ្ឌលសំណេរនៃរាជធានី ខេត្តទាំង ២៥ ទូទាំងប្រទេស នៅថ្ងៃទី ២០ កញ្ញា ២០២៥។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ មានបេក្ខជនសរុបជាង ១៤ម៉ឺននាក់ ដែលក្នុងនោះមានថ្នាក់វិទ្យាសាស្រ្តប្រមាណ ៤ម៉ឺននាក់ និងថ្នាក់វិទ្យាសាស្រ្តសង្គមប្រមាណ ១០ម៉ឺននាក់។ ដូចនឹងឆ្នាំកន្លងទៅ លទ្ធផលប្រឡងនឹងឈរលើគោលការណ៍ច្បាប់ យុត្តិធម៌ តម្លាភាព ពោលគឺ «អ្នកចេះ គឺជាប់»៕
