ខេត្តព្រះសីហនុ កំពុងរងជំនន់ទឹកភ្លៀង បណ្តាលឱ្យលិចផ្ទះ និងខូចខាតសម្ភារៈពលរដ្ឋ

ព្រះសីហនុ៖ ខេត្តព្រះសីហនុ កំពុងរងជំនន់ទឹកភ្លៀង បណ្តាលឱ្យលិចផ្ទះ និងខូចខាតសម្ភារៈពលរដ្ឋ។ បើតាមសេចក្តីរាយការណ៍ពីប្រជាពលរដ្ឋ បានឱ្យដឹងថា ភ្លៀងខ្លាំងតាំងពីយប់ថ្ងៃទី១៥ រហូតឈានចូលដល់ទាបភ្លឺថ្ងៃទី១៦ សីហា ២០២៥នេះ។

បើតាមប្រភពដដែល ផ្ទះពលរដ្ឋ រស់នៅម្តុំស្រែត្រកួន ចំការស្ពៃ សង្កាត់២ បានលិចចំនួន២ដង ក្រោយភ្លៀងទឹកក៏បានស្រកទៅវិញ និង នៅតំបន់សង្កាត់១ ក្រុងព្រះសីហនុ ក៏ដូចគ្នាដែរ បន្តជនលិច មកដល់ព្រឹកនេះ ប៉ុន្តែពុំមានប៉ះពាល់ដល់អាយុ ជីវិតមនុស្ស ឬរងការខូចខាតធ្ងន់ធ្ងរនោះទេ។

យោងតាមសេចក្តីជូនដំណឹងពីក្រសួងធនធានទឹកនិងឧតុនិយមបានឲ្យដឹងថា សម្ពាធទាបកើតនៅសមុទ្រចិនខាងត្បូងមានឥទ្ធិពលលើសមុទ្រអានដាមម៉ែន ឈូងសមុទ្រថៃ អាងទន្លេមេគង្គ លើរបបខ្យល់មូសុងនិរតី និងព្រះរាជាណាចក្រកម្ពុជា។

ស្ថានភាពបែបនេះ ចាប់ពីថ្ងៃទី១៦ ដល់ថ្ងៃទី១៨ សីហា ឆ្នាំ២០២៥ នៅតំបន់មាត់សមុទ្រ -សីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៥°C។ ខ្យល់បក់មកពីទិសនិរតីនិងបស្ចិម មានល្បឿនមធ្យម២ម៉ែត្រ/វិនាទី។

ខេត្តកោះកុង ព្រះសីហនុកំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី៤០% ។រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា១,៥០ម៉ែត្រ៕