លោក លី ធុជ ស្នើសុំអង្គការប្រទេសន័រវេស ធ្វើយុទ្ធនាការជាសកលប្រឆាំងនឹងការប្រើប្រាស់គ្រាប់បែកចង្កោមរបស់យោធាថៃ

ភ្នំពេញ៖ លោក លី ធុជ នាថ្ងៃទី០៦ សីហានេះ បានស្នើសុំអង្គការជំនួយរបស់ប្រជាពលរដ្ឋន័រវែស (Norwegian People’s Aid) នៃប្រទេសន័រវេស ជួយធ្វើយុទ្ធនាការជាសកលប្រយុទ្ធប្រឆាំងនឹងការប្រើប្រាស់គ្រាប់បែកចង្កោមរបស់យោធាថៃ។

លោក លី ធុជ អនុប្រធានទី១ អាជ្ញាធរមីន ជួបពិភាក្សាជាមួយលោក Hans Risser នាយកអង្គការជំនួយរបស់ប្រជាពលរដ្ឋន័រវែស (NPA) ប្រចាំកម្ពុជា ដោយលោក លី ធុជ បានលើកឡើងថា ក្នុងជម្លោះប្រដាប់អាវុធរវាងកម្ពុជា-ថៃ រយៈពេល ៥ថ្ងៃ ចាប់ពីថ្ងៃទី២៤-២៨ ខែកក្កដា ឆ្នាំ២០២៥ កន្លងនេះ យោធាថៃបានប្រើប្រាស់សព្វាវុធធុនធ្ងន់គ្រប់ប្រភេទដែលពិភពលោកហាមប្រាម ក្នុងនោះរួមទាំងការប្រើប្រាស់គ្រាប់បែកចង្កោម ដើម្បីធ្វើការឈ្លានពានមកលើទឹកដីប្រទេសកម្ពុជា។

លោក លី ធុជ បន្តទៀតថា ការប្រើប្រាស់គ្រាប់បែកចង្កោមរបស់យោធាថៃ បានបង្កនូវផលប៉ះពាល់យ៉ាងធ្ងន់ធ្ងរ និងបង្កគ្រោះថ្នាក់យូរអង្វែងដល់ប្រជាជនកម្ពុជាស្លូតត្រង់ ជាពិសេសក្មេងតូចៗ ក៏ដូចបង្កភាពភ័យខ្លាចដល់សហគមន៍ជាច្រើនជំនាន់ទៅមុខ។

ជាការបង្ការនូវបញ្ហានេះបន្តទៅទៀត លោកអនុប្រធានទី១ អាជ្ញាធរមីនរូបនេះ បានស្នើសុំឱ្យអង្គការ NPA នៃប្រទេសន័រវេស គាំទ្រកម្ពុជា និងជួយធ្វើយុទ្ធនាការជាសកល ដើម្បីប្រយុទ្ធប្រឆាំងនឹងការប្រើប្រាស់គ្រាប់បែកចង្កោមរបស់យោធាថៃ មកលើប្រទេសកម្ពុជា៕