កំពង់ចាម ៖ វិទ្យាល័យ ហ៊ុន សែន ពាមជីកង នាព្រឹកថ្ងៃទី៣០ ខែមិថុនា ឆ្នាំ២០២៥ បានរៀបចំ “ពិព័រណ៍ស្នាដៃសិស្សប្រចាំឆ្នាំសិក្សា២០២៤-២០២៥” ក្នុងស្រុកកងមាស ខេត្តកំពង់ចាម។ ពិព័រណ៍នេះបានផ្តល់ឱកាសឱ្យសិស្សបញ្ចេញសមត្ថភាព ទេពកោសល្យដល់សហគមន៍ឱ្យចាប់អារម្មណ៍លើការអប់រំបែបស្ទែម(STEM) ដែលឆ្លុះបញ្ចាំងពីបំណិនរបស់សិស្ស។
យោងតាមគេហទំព័រក្រសួងអប់រំ វិទ្យាល័យ ហ៊ុនសែន ពាមជីកង បានរៀបចំពិព័រណ៍នេះឡើង ដើម្បីបង្ហាញនូវសមិទ្ធផលដែលជាស្នាដៃកើតចេញពីការសិក្សារបស់សិស្សានុសិស្ស បង្កើនចំណងទំនាក់ទំនងរវាងសាលារៀន សហគមន៍ មាតាបិតាអាណាព្យាបាលសិស្ស និងជាការបង្ហាញបរិស្ថានសិក្សាដល់សហគមន៍។
ការរៀបចំពិធីពិព័រណ៍ស្នាដៃសិស្សវិទ្យាល័យ ហ៊ុន សែន ពាមជីកង ធ្វើឡើងរយៈពេលមួយថ្ងៃ ដោយបានរៀបចំតុបតែងស្តង់ចំនួន២៤១ស្តង់ ស្មើនឹង២៤១ប្រធានបទ ដែលបង្ហាញពីសមិទ្ធផលដែលសិស្សខិតខំធ្វើឡើង និងចែករំលែកដល់មិត្តរួមថ្នាក់។ ក្នុងឆ្នាំសិក្សា២០២៤-២០២៥នេះ វិទ្យាល័យ ហ៊ុន សែន ពាមជីកង មានសិស្សានុសិស្សចំនួន៣៨ថ្នាក់ មាន៦កម្រិតផងដែរ។
បើតាមប្រភពដដែល វិទ្យាល័យ ហ៊ុន សែន ពាមជីកងបានកែប្រែមុខមាត់ថ្មី ក្លាយជាសាលារៀនជំនាន់ថ្មី ជាពិសេសបានជាប់ស្ដង់ដាសាលារៀនគំរូកាលពីឆ្នាំកន្លងទៅផងដែរ។ ការតាំងពិព័រណ៍នេះជាការបង្ហាញពីការយល់ដឹង និងអ្វីដែលសិស្សានុសិស្សបានរៀន ចូលរួមធ្វើសកម្មភាពលើអ្វីដែលគេបានរៀន និងជាការសហការគ្នាពីការយល់ដឹង ធ្វើឱ្យការរៀនសូត្រមានអត្ថន័យកាន់តែខ្លាំងក្លាឡើង។
អំឡុងពេលកម្មវិធី លោក វង ភិរុណ អនុរដ្ឋលេខាធិការនៃក្រសួងអប់រំ បានលើកឡើងអំពីការប្រើប្រាស់បញ្ញាសិប្បនិម្មិតដែលម៉ាស៊ីនដើរតួនាទីជំនួសមនុស្ស និងមានភាពឆ្លាតវៃ ហើយការតាំងពិព័រណ៍នេះនឹងជួយសិស្សឱ្យអនុវត្តចំណេះដឹងតាមសេណារីយ៉ូពិភពពិត ដោយបទពិសោធន៍ជាក់ស្ដែងទាំងនេះនឹងជួយសិស្សឱ្យអនុវត្តចំណេះដឹងរបស់ខ្លួនតាមរបៀបដ៏មានប្រសិទ្ធភាព និងរៀបចំខ្លួនសម្រាប់ប្រកួតប្រជែងក្នុងការសិក្សាវិជ្ជាជីវៈក្នុងពេលអនាគត។ លោកក៍បានបន្ថែមទៀតថា សាលាជំនាន់ថ្មីនេះ គឺបានផ្តល់បច្ចេកទេស ចំណេះជំនាញយ៉ាងច្រើន ជាពិសេសនោះទេពកោសល្យតាមចំណូលចិត្តរបស់សិស្ស ដើម្បីស្វែងយល់ខ្លួនឯង និងត្រៀមខ្លួនចាប់យកអាជីពនៅពេលអនាគតផងដែរ។
គួរបញ្ជាក់ផងដែរថា កម្មវិធីពិព័រណ៍នេះ មានការចូលរួមពីលោក វង ភិរុណ អនុរដ្ឋលេខាធិការនៃក្រសួងអប់រំ ថ្នាក់ដឹកនាំក្រសួង ក្រុមប្រឹក្សាភិបាលសាលារៀនជំនាន់ថ្មីខេត្តកំពង់ចាម តំណាងអង្គការខេប(KAPE) លោកប្រធានក្រុមប្រឹក្សាស្រុកកងមាស លោកអភិបាលនៃគណៈអភិបាលស្រុកកងមាស គណៈកម្មការគ្រប់គ្រងសាលា គណៈនាយក លោកគ្រូ អ្នកគ្រូ មាតាបិតា អាណាព្យាបាល សិស្សសាលាបឋមសិក្សា និងសិស្សានុសិស្សទាំងអស់នៃវិទ្យាល័យ ហ៊ុន សែន ពាមជីកង សរុបប្រមាណ១៥០០នាក់៕
