យុវជនកម្ពុជា១៥ក្រុមនឹងបង្ហាញ«ដំណោះស្រាយបច្ចេកវិទ្យាសម្រាប់សហគមន៍»នៅកម្មវិធីប្រកួតថ្នាក់ជាតិ

ភ្នំពេញ៖ យុវជនកម្ពុជា១៥ក្រុម នឹងចូលរួមកម្មវិធីប្រកួតថ្នាក់ជាតិ Technovation Girls Cambodia x Future Digital Talents ឆ្នាំ ២០២៥ នៅថ្ងៃទី ២៨ ខែ មិថុនា ឆ្នាំ ២០២៥ នៅ បណ្ឌិតសភាបច្ចេកវិទ្យាឌីជីថលកម្ពុជា ( អគារ Innovation Center ជាន់ទី៤)។ កម្មវិធីប្រកួតនេះ នឹងបើកអនុញ្ញាតឱ្យសាធារណជនចូលរួមដោយសេរី។

យោងតាមក្រុមការងារ Tech For Kids បានឱ្យដឹងថា កម្មវិធី Technovation Girls Cambodia x Future Digital Talents គឺជាកម្មវិធីបណ្តុះបណ្តាលសហគ្រិនភាពបច្ចេកវិទ្យា ដែលបានប្រមូលផ្តុំ និងគាំទ្រយុវជនដែលមានអាយុពី ៨ ដល់ ១៨ ឆ្នាំ ដែលបានខិតខំប្រឹងប្រែង និងមានការប្តេជ្ញាចិត្តខ្ពស់មកពីទីក្រុងភ្នំពេញ និងបណ្តាខេត្តនានាទូទាំងប្រទេសកម្ពុជា ឲ្យប្រើប្រាស់បច្ចេកវិទ្យាដើម្បីដោះស្រាយបញ្ហាសង្គម។ យើងខ្ញុំសូមអញ្ជើញសាធារណជនទាំងអស់ចូលរួមទស្សនា និងគាំទ្រព្រឹត្តិការណ៍នេះ ដើម្បីឃើញផ្ទាល់នូវសមត្ថភាព និងការខិតខំរបស់ពួកគាត់។

ព្រឹត្តិការណ៍ឆ្នាំ ២០២៥ នឹងបង្ហាញពីការរីកចម្រើនរបស់កម្មវិធី Technovation Girls Cambodia ដែលមានប្រវត្តិ ១១ ឆ្នាំនៃការបណ្ដុះបណ្ដាល និងគាំទ្រក្មេងស្រីជាង ៣០០០ នាក់ក្នុងវិស័យបច្ចេកវិទ្យា។ សម្រាប់ឆ្នាំ ២០២៥ នេះ កម្មវិធីបានឈានចូលដំណាក់កាលថ្មីមួយ ដោយពង្រីកវិសាលភាពរបស់ខ្លួនតាមរយៈកម្មវិធី Future Digital Talents ដើម្បីបើកទូលាយឲ្យយុវជនទាំងប្រុសទាំងស្រីបានចូលរួម បង្កើតបច្ចេកវិទ្យា និងដោះស្រាយបញ្ហាសង្គមទាំងអស់គ្នា។ ការវិវត្តន៍នេះបញ្ជាក់ពីការប្តេជ្ញាចិត្តរបស់យើងក្នុងការផ្តល់អំណាចបច្ចេកវិទ្យាយ៉ាងទូលំទូលាយដល់យុវជនកម្ពុជា។កម្មវិធី Technovation Girls Cambodia x Future Digital Talents ឆ្នាំនេះ មានក្រុមសិស្សានុសិស្សសរុប ៦៤ ក្រុមបានដាក់ពាក្យចូលរួម។ ក្រុមទាំងអស់នេះបានខិតខំប្រឹងប្រែងយ៉ាងខ្លាំងក្លាពេញមួយវគ្គបណ្តុះបណ្តាល ក្រោមការណែនាំពីអ្នកណែនាំដែលមានបទពិសោធន៍ ដើម្បីអភិវឌ្ឍគំនិត និងបង្កើតគម្រោងបច្ចេកវិទ្យាដ៏អស្ចារ្យរបស់ខ្លួន។ ក្នុងចំណោមក្រុមទាំងអស់នេះ មានតែ ១៥ ក្រុមប៉ុណ្ណោះ ដែលត្រូវបានជ្រើសរើសជាក្រុមជម្រុះចុងក្រោយ ដើម្បីចូលរួមប្រកួតនៅកម្មវិធីថ្នាក់ជាតិ។

កម្មវិធីប្រកួតថ្នាក់ជាតិនឹងប្រព្រឹត្តទៅនៅថ្ងៃទី ២៨ ខែ មិថុនា ឆ្នាំ ២០២៥ ចាប់ពីម៉ោង ១ រសៀល ដល់ ម៉ោង ៥ ល្ងាច។ កម្មវិធីនេះនឹងប្រារព្ធធ្វើឡើងនៅអគារ Innovation Center ជាន់ទី៤ នៃបណ្ឌិតសភាបច្ចេកវិទ្យាឌីជីថលកម្ពុជា។ សម្រាប់សាធារណជនទាំងអស់អាចចូលរួមទស្សនាដោយសេរី និងឥតគិតថ្លៃ។ សូមចុះឈ្មោះចូលរួមតាមរយៈតំណភ្ជាប់នេះ៖ https://forms.gle/tYa4ePcQCUKKrXL1A។

ក្នុងព្រឹត្តិការណ៍ប្រកួតថ្នាក់ជាតិនេះ អ្នកចូលរួមនឹងឃើញផ្ទាល់ពីភស្តុតាងដ៏រស់រវើកនៃការខិតខំប្រឹងប្រែង ការប្តេជ្ញាចិត្ត និងទេពកោសល្យរបស់សិស្សានុសិស្សមកពីទីក្រុងភ្នំពេញ និងបណ្តាខេត្តនានាទូទាំងប្រទេស។ គម្រោងបច្ចេកវិទ្យាដ៏អស្ចារ្យចំនួន ១៥ គម្រោង ដែលជាស្នាដៃនៃការខិតខំ ការរៀនសូត្រ និងការច្នៃប្រឌិតពេញមួយវគ្គបណ្តុះបណ្តាល របស់ក្រុមសិស្សានុសិស្សឆ្នើមទាំងនេះ នឹងត្រូវបង្ហាញ។ គម្រោងនីមួយៗមិនត្រឹមតែឆ្លុះបញ្ចាំងពីទេពកោសល្យ ជំនាញបច្ចេកវិទ្យា និងការយល់ដឹងស៊ីជម្រៅអំពីបញ្ហាសង្គមប៉ុណ្ណោះទេ ប៉ុន្តែក៏បង្ហាញពីសមត្ថភាពរបស់ពួកគាត់ក្នុងការបង្កើតដំណោះស្រាយជាក់ស្តែង និងមានឥទ្ធិពលជាវិជ្ជមានដល់សហគមន៍តាមរយៈបច្ចេកវិទ្យា។

គួរបញ្ជាក់ថា កម្មវិធីប្រកួតថ្នាក់ជាតិ មានការចូលរួមប្រកួតដោយក្រុមចំនួន១៥ ដែលត្រូវបានបែងចែកជាបីកម្រិតរួមមាន Beginner Division, Junior Divisi, និង Senior Division។ កម្រិត Beginner Division មានក្រុម AI_GIRLS, Takor Girls, KIS Junior Girls, GreenNature, KESARARAM Digital, Chambokae Primary School។ កម្រិត Junior Division មានក្រុម The Processors Environment, Yerng Sdab, Anakut និងកម្រិត Senior Division មានក្រុម Atta Girls, supersolver, Stellar Girls, MNRR, Delight, Torico៕