ភ្នំពេញ៖ កញ្ញា អុន ស្រីមាន អតីតជ័យលាភីអាហារូបករណ៍ហាប់ស្វែល ជំរុញឱ្យសិស្សស្រីដែលនឹងប្រលងបាក់ឌុបឆ្នាំនេះដាក់ពាក្យអាហារូបករណ៍ដ៏ល្អនេះ ដើម្បីទទួលបានការស្នាក់នៅជាមួយសិស្សនិស្សិតស្រីផ្សេងទៀតដោយមានសុវត្ថិភាព និងមានឱកាសពង្រឹងសមត្ថភាពតាមរយៈការបណ្តុះបណ្តាលចំណេះនិងជំនាញជាច្រើនពីអង្គការ។ អាហារូបករណ៍ដែលផ្តល់ជូនជាកន្លែងស្នាក់នៅ ការហូបចុក ការបណ្តុះបណ្តាលជំនាញ កំពុងបើកទទួលពាក្យរហូតដល់ថ្ងៃទី ១០ មិថុនា ២០២៥។
កញ្ញា អុន ស្រីមាន ជាអតីតនិស្សិតអក្សរសាស្ត្រខ្មែរ ដែលបានបញ្ចប់ការសិក្សាមកពីសាកលវិទ្យាល័យភូមិន្ទភ្នំពេញ កាលពីឆ្នាំ២០២២ ហើយបច្ចុប្បន្នកញ្ញាប្រកបអាជីពជាអ្នកសារព័ត៌មាននៅក្នុងស្ថាប័នមួយ។ កញ្ញាទទួលបានអាហារូបករណ៍ហាប់ស្វែលកាលពីឆ្នាំ២០១៨ ដល់ឆ្នាំ២០២២ ដោយកញ្ញាទទួលបានកន្លែងស្នាក់នៅ និងអាហារ៣ពេល រួមជាមួយនឹងថ្នាក់រៀនបន្ថែមជាច្រើនទៀតរួមមានថ្នាក់ភាសាអង់គ្លេស ភាសាបារាំង ថ្នាក់កុំព្យូទ័រ វគ្គបណ្តុះបណ្តាលពីភាពជាអ្នកដឹកនាំ ជំនាញត្រិះរិះពិចារណា ការជំរុញការអានព័ត៌មានពីព្រឹត្តិការណ៍ជាតិ និងអន្តរជាតិ បូកផ្សំជាមួយការសង្ខេបអត្ថបទព័ត៌មានជាភាសាខ្មែរ និងអង់គ្លេសប្រចាំសប្តាហ៍។
កញ្ញា អុន ស្រីមាន បានថ្លែងប្រាប់ស៊ីស៊ីថាមស៍ថា នៅពេលកញ្ញាទទួលបានអាហារូបករណ៍អំឡុងពេល៤ឆ្នាំ ដែលកញ្ញារៀននៅសាកលវិទ្យាល័យ កញ្ញាទទួលបានកន្លែងស្នាក់នៅប្រកបដោយផាសុកភាព និងសុវត្ថិភាព ដោយមិនចាំបាច់បារម្ភរឿងចំណាយលើកន្លែងស្នាក់នៅ អាហារហូបចុក ទឹកភ្លើងនោះទេ ពោលគឺកញ្ញាចំណាយតែលើថ្លៃបង់សាលា និងចំណាយផ្ទាល់ខ្លួនផ្សេងៗប៉ុណ្ណោះ។
កញ្ញាបានសង្កត់ធ្ងន់ថា អាហារូបករណ៍ដែលកញ្ញាបានទទួលពិតជាមានសារៈសំខាន់ណាស់ក្នុងការកសាងសមត្ថភាព និងផ្លាស់ប្ដូរជីវិតរបស់កញ្ញា ដោយសារតែអង្គការមានផ្តល់វគ្គបណ្តុះបណ្តាលនានាដូចជាការនិយាយជាសាធារណៈ ព្រមទាំងកម្មវិធីប្រកួតនានាដែលកញ្ញាមានឱកាសក្នុងការបញ្ចេញសមត្ថភាព និងបង្កើតផលវិជ្ជមានតាមរយៈគម្រោងដែលកញ្ញាបានធ្វើផងដែរ។
បើតាមកញ្ញាស្រីមាន បានឱ្យដឹងបន្តទៀតថា ដំណើរការប្រឡងអាហារូបករណ៍នេះមាន ៣ ដំណាក់កាល។ ដំណាក់កាលទី ១ គឺការសរសេរសំណេរតាមប្រធានបទដែលហាប់ស្វែលបានកំណត់ឱ្យ។ បន្ទាប់មក ដំណាក់កាលទី ២ គឺការសម្ភាសន៍ផ្ទាល់មាត់ ហើយចុងក្រោយ ដំណាក់កាលទី ៣ គឺការរង់ចាំលទ្ធផលប្រឡងបាក់ឌុប។
បន្ថែមពីនេះ អតីតនិស្សិតអាហារូបករណ៍ហាប់ស្វែលរូបនេះ បានផ្តល់ជាគន្លឹះសម្រាប់សិស្សស្រីដែលមានបំណងក្នុងការដាក់ពាក្យអាហារូបករណ៍នេះថា “សម្រាប់ប្អូនៗដែលចង់ដាក់អាហារូបករណ៍នេះ ខ្ញុំសូមណែនាំឱ្យខិតខំរៀនឱ្យបានច្រើនដើម្បីប្រឡងបានពិន្ទុល្អសម្រាប់បាក់ឌុប។ បន្ទាប់មក ត្រូវគិតទស្សនវិស័យសម្រាប់ខ្លួន តើខ្លួនស្រឡាញ់ជំនាញអ្វីនៅសាកលវិទ្យាល័យ ហេតុអ្វីបានជាស្រឡាញ់ជំនាញនោះ? តើថ្ងៃអនាគតប្អូនចង់ក្លាយជាអ្វី ដើម្បីអភិវឌ្ឍន៍ខ្លួន ជួយគ្រួសារ និងសង្គមជាតិ។ ក្រៅពីគិតពីទស្សនវិស័យរបស់ខ្លួន ក៏ត្រូវខិតខំរៀនភាសាអង់គ្លេសដែរ ព្រោះនៅសាកលវិទ្យាល័យ យើងត្រូវការប្រើភាសាច្រើនដូចគ្នា។”។
គួរបញ្ជាក់ថា អាហារូបករណ៍នេះត្រូវបានផ្តល់ជូនជាពិសេសសម្រាប់សិស្សនារីនៅតាមបណ្តាខេត្តដែលទើបតែបានបញ្ចប់ការសិក្សាថ្នាក់បាក់ឌុបនាឆ្នាំថ្មីនេះ ហើយមានបំណងបន្តការសិក្សានៅសាកលវិទ្យាល័យក្នុងរាជធានីភ្នំពេញ ឬសិស្សនារីដែលបានបញ្ចប់បាក់ឌុបហើយតែមិនទាន់បានចូលរៀននៅសាកលវិទ្យាល័យ។ ដើម្បីមានសិទ្ធិដាក់ពាក្យ សិស្សនារីត្រូវបំពេញលក្ខខណ្ឌមួយចំនួនដូចជា៖ ជាសិស្សដែលទទួលបានពិន្ទុល្អក្នុងការប្រឡងបាក់ឌុប ជាសិស្សសកម្ម និងចូលរួមកិច្ចការសង្គម មានសមត្ថភាពភាសាអង់គ្លេសល្អ និងមានគោលដៅច្បាស់លាស់សម្រាប់អនាគតខ្លួនឯង និងប្រទេសជាតិ។ អាហារូបករណ៍នឹងបន្តទទួលពាក្យដល់ថ្ងៃទី ១០ មិថុនា ២០២៥ តាមរយៈតំណភ្ជាប់៖ https://harpswell.org/harpswell-recruitment៕
.png?1744178821)
