ភ្នំពេញ៖ លោកស្រី ឱក សុគន្ធកញ្ញា ស្ម័គ្រចិត្តទទួលតំណែងជាទូតសុច្ឆន្ទៈនៃកាយរឹទ្ធិជាតិកម្ពុជា ដើម្បីលើកកម្ពស់ការអប់រំដល់យុវជនជំនាន់ក្រោយ តាមរយៈការផ្សព្វផ្សាយពីសកម្មភាពកាយរឹទិ្ធជាតិកម្ពុជា។ ការប្រកាសនេះ ត្រូវបានធ្វើឡើងនាថ្ងៃទី ១៩ ឧសភា នៅទីស្តីការក្រសួងអប់រំ ក្រោមវត្តមាន បណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ និងជាប្រធានកាយរឹទ្ធិជាតិកម្ពុជា បានអញ្ជើញជាអធិបតីក្នុងពិធីសច្ចាប្រណិធាន និងបំពាក់កន្សែងជូនលោកស្រី។
នាព្រឹកថ្ងៃទី១៩ ខែឧសភា ឆ្នាំ២០២៥ នៅទីស្តីការក្រសួងអប់រំ ពិធីសច្ចាប្រណិធាន និងបំពាក់កន្សែងជូនលោកស្រី ឱក សុគន្ធកញ្ញា និងប្រកាសជាទូតសុច្ឆន្ទៈនៃកាយរឹទ្ធិជាតិកម្ពុជា មានការចូលរួមពីសំណាក់ ថ្នាក់ដឹកនាំកាយរឹទ្ធិជាតិកម្ពុជា និងក្រុមការងារពាក់ព័ន្ធក្រោមឱវាទ។
ក្នុងឱកាសនោះ បណ្ឌិតសភាចារ្យ បានវាយតម្លៃខ្ពស់ចំពោះការស្ម័គ្រចិត្តរបស់លោកស្រី ឱក សុគន្ធកញ្ញា ក្នុងការទទួលយកភារកិច្ចជាទូតសុច្ឆន្ទៈនៃកាយរឹទ្ធិជាតិកម្ពុជា ដើម្បីផ្សព្វផ្សាយពីសកម្មភាពកាយរឹទ្ធិជាតិកម្ពុជា សំដៅលើកកម្ពស់ការអប់រំដល់យុវជនជំនាន់ក្រោយ ស្របតាមអនុសាសន៍ដ៏ខ្ពង់ខ្ពស់របស់ សម្តេច ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលតែងតែយកចិត្តទុកដាក់ជំរុញឱ្យយុវជនចូលរួមក្នុងការងារសង្គម ដើម្បីបង្កើនភាពធន់ និងចំណេះដឹង ប្រែក្លាយខ្លួនជាកម្លាំងចលករក្នុងការចូលរួមអភិវឌ្ឍសេដ្ឋកិច្ច សង្គមជាតិ។
ជាការឆ្លើយតប លោកស្រី ឱក សុគន្ធកញ្ញា បានគូសបញ្ជាក់ពីការប្ដេជ្ញាចិត្តខ្ពស់ក្នុងការរួមចំណែកឱ្យកាន់តែសកម្មថែមទៀតដល់សកម្មភាពមនុស្សធម៌ សប្បុរសធម៌ ធ្វើជាគំរូបង្ហាញនូវទង្វើល្អក្នុងការរស់នៅ សច្ចធម៌ គុណធម៌ សន្តិភាពផ្លូវចិត្ត ព្រមទាំងជំរុញលើកទឹកចិត្តយុវជនជំនាន់ក្រោយឱ្យក្លាយជាកូនល្អ មិត្តល្អ សិស្សល្អ និងពលរដ្ឋល្អ។ ក្នុងនាមជាទូតសុច្ឆន្ទៈ លោកស្រី នឹងបន្តជួយផ្សព្វផ្សាយរូបភាពកាយរឹទ្ធិជាតិកម្ពុជា និងការអប់រំនៅក្នុងព្រះរាជាណាចក្រកម្ពុជាឱ្យកាន់តែទូលំទូលាយថែមទៀត។
គួរបញ្ជាក់ថា លោកស្រី ឱក សុគន្ធកញ្ញា ជាតារាចម្រៀងមួយរូបដែលមានប្រជាប្រិយភាពក្នុងពេលបច្ចុប្បន្ន។ លោកស្រី ប្រឡូកក្នុងវិស័យសិល្បៈតាំងពីកុមារភាពមកម្ល៉េះ ដែលច្រៀងនូវបទចម្រៀងទាំងមនោសញ្ចេតនា ការជំរុញទឹកចិត្ត និងប្រភេទផ្សេងៗទៀតជាច្រើន៕
