ក្រសួងប្រៃសនីយ៍ បើកទទួលពាក្យជ្រើសរើសយុវជនចូលរួមកម្មវិធី​ «ប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ២០២៥»

ភ្នំពេញ៖ ក្រសួងប្រៃសនីយ៍ ជ្រើសរើសបេក្ខជនដាក់ពាក្យចូលរួម «កម្មវិធីប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ២០២៥» នៅថ្ងៃទី១៨ ខែឧសភា ឆ្នាំ២០២៥ ដើម្បីជ្រើសរើសបេក្ខភាពឆ្នើមចំនួន ៤រូប តំណាងប្រទេសកម្ពុជាចូលរួមក្នុងការប្រកួតថ្នាក់តំបន់ នៅប្រទេសថៃ។

យោងតាមសេចក្តីជូនដំណឹងស្តីពីការជ្រើសរើសបេក្ខជនចូលរួម «កម្មវិធីប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ២០២៥» បានឱ្យដឹងថា ចំពោះនីតិវិធីនៃការជ្រើសរើស គឺតម្រូវឱ្យបេក្ខជន បេក្ខនារីទាំងអស់មានអាយុក្រោម ២៥ ឆ្នាំ ហើយត្រូវដាក់ពាក្យចូលរួមការប្រកួតប្រជែងតាមរយៈតំណភ្ជាប់ https://go.gov.kh/mptc/cncc2025 ចាប់ពីថ្ងៃជូនដំណឹងនេះរហូតដល់ថ្ងៃទី១០ ខែឧសភា ឆ្នាំ២០២៥ វេលាម៉ោង ២៣:៥៩ នាទី។ ក្នុងករណី មានចម្ងល់បន្ថែម សូមទាក់ទងទៅកាន់លេខ 015 520 707/ 099 496 767។

ក្រោយដាក់ពាក្យអនឡាញ បេក្ខជន បេក្ខនារីទាំងអស់នឹងត្រូវឆ្លងកាត់ការជម្រុះតាមប្រព័ន្ធអនឡាញនៅថ្ងៃទី១៣ ខែឧសភា ឆ្នាំ២០២៥។ ក្រោយជាប់ដំណាក់កាលជម្រុះ បេក្ខជន បេក្ខនារីចំនួន ១០០រូប នឹងត្រូវបានទាក់ទងដើម្បីចូលរួម កម្មវិធីប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ ២០២៥។ កម្មវិធីប្រកួតថ្នាក់ជាតិនឹងប្រព្រឹត្តទៅនៅថ្ងៃទី១៨ ខែឧសភា ឆ្នាំ២០២៥នៅបណ្ឌិត្យសភាបច្ចេកវិទ្យាឌីជីថលកម្ពុជា (CADT)។

បើតាមក្រសួងប្រៃសនីយ៍ អត្ថប្រយោជន៍នៃការប្រកួតប្រជែងរួមមាន ជ័យលាភីលេខ ១ នឹងទទួលបានថវិកាចំនួន ២,០០០,០០០ រៀល, ជ័យលាភីលេខ ២ នឹងទទួលបានថវិកាចំនួន ១,៥០០,០០០ រៀល, ជ័យលាភីលេខ ៣ នឹងទទួលបានថវិកាចំនួន ១,០០,០០០ រៀល, រីឯជ័យលាភីលេខ ៤ និងលេខ ៥ ទទួលបានថវិកាក្នុងម្នាក់ចំនួន ៥០០,០០០ រៀល។

ក្រោយការចេញលទ្ធផល ក្រសួងប្រៃសនីយ៍នឹងធ្វើការជ្រើសរើសបេក្ខជន បេក្ខនារីចំនួន ១៥រូប បន្ថែមពីលើបេក្ខជនជ័យលាភីចំនួន ៥រូប ខាងលើ។ បេក្ខជន បេក្ខនារីទាំង ២០ រូប នេះ នឹងទទួលបានការបណ្ដុះបណ្ដាល និងពង្រឹងជំនាញបច្ចេកទេសផ្នែកសន្តិសុខសាយប័រពីគ្រូបង្គោលរយៈពេល ៤ខែ សម្រាប់ត្រៀមខ្លួនក្នុងការប្រកួតវគ្គបន្ទាប់។ ក្រោយការបណ្តុះបណ្តាលរយៈពេល ៤​ ខែ បេក្ខជនទាំង២០រូបនឹងត្រូវប្រឡងតេស្តសមត្ថភាព ដើម្បីក្លាយជាតំណាងប្រទេសកម្ពុជាចូលរួមប្រកួតប្រជែងក្នុងថ្នាក់តំបន់ នៅប្រទេសថៃ។ ក្នុងចំណោមបេក្ខភាពទាំង ២០រូបខាងលើ មានតែ ៤រូប ប៉ុណ្ណោះ ដែលនឹងមានឱកាសតំណាងកម្ពុជា សម្រាប់ចូលរួមប្រកួតវគ្គអាស៊ាន (ASEAN ROUND) និងវគ្គអាស៊ានសាយប័រស៊ីហ្គេម (ASEAN Cyber SEA Game) រៀបចំដោយមជ្ឈមណ្ឌលអាស៊ាន-ជប៉ុន សម្រាប់កសាងសមត្ថភាពសន្តិសុខសាយបរ ASEAN-Japan Cybersecurity Capacity Building Centre (AJCCBC) នៅប្រទេសថៃ។

គួរបញ្ជាក់ថា កម្មវិធីប្រកួតថ្នាក់ជាតិផ្នែកសន្តិសុខសាយបរិប្រចាំឆ្នាំ២០២៥ ជាកម្មវិធីប្រកួតប្រជែងលក្ខណៈបុគ្គលដោយ តម្រូវឱ្យអ្នកចូលរួមដោះស្រាយបញ្ហាសន្តិសុខសាយប័រ (Cybersecurity Challenges) ទៅលើដែនដូចជាវិស្វកម្មបញ្ច្រាស (Reverse Engineering) គ្រីបតូក្រាហ្វី (Cryptography) សន្តិសុខគេហទំព័រ (Web Security) កោសល្យវិច្ច័យ (Forensics) ឬការវាយប្រហារលើកម្មវិធីប្រព័ន្ធ Binary (Binary Exploitation) ជាដើម ដោយស្វែងរកបំណែក នៃព័ត៌មានហៅថា “Flag” ដែលលាក់នៅក្នុងលំហាត់នីមួយៗ៕