សង្រ្កាន្តខេមតិច បានប្រមូលផ្តុំយុវជន «លេងល្បែងប្រជាប្រិយ» សម្បូរបែប ដើម្បីចូលរួមប្រារព្ធពិធីបុណ្យចូលឆ្នាំថ្មីប្រពៃណីខ្មែរ

ភ្នំពេញ៖ សាកលវិទ្យាល័យខេមតិច បានផ្តួចផ្តើមរៀបចំកម្មវិធីសង្ក្រាន្ត ដោយមានការចូលរួមស្ម័គ្រចិត្តពីនិស្សិតជាង៣០នាក់ កាលពីថ្ងៃទី៣ មេសា ២០២៥ រួមបញ្ចូលនូវសកម្មភាពនៃវប្បធម៌ប្រពៃណីជាច្រើនរួមមាន ការរាំរបាំ ការលេងល្បែងប្រជាប្រិយ ការដាក់បង្ហាញស្នាដៃនិស្សិត បូកផ្សំជាមួយការបង្ហាញទេពកោសល្យរបស់និស្សិតផ្នែកចម្រៀងនៅបរិវេណសាកលវិទ្យាល័យផ្ទាល់។ កម្មវិធីសង្ក្រាន្តនេះបានស្វាគមន៍សិស្សានុសិស្សមកពីបណ្តាវិទ្យាល័យមួយចំនួនរួមមាន វិទ្យាល័យព្រែកលៀប វិទ្យាល័យព្រែកអញ្ចាញ និងវិទ្យាល័យផ្សេងៗទៀត ដែលនៅក្បែរបរិវេណនេះផ្ទាល់។

កាលពិថ្ងៃទី ៣ មេសា ២០២៥ នាវេលាម៉ោង ៣រសៀល និស្សិតខេមតិចជាង ៣០ នាក់ បាន​សហការគ្នាយ៉ាងសកម្មក្នុងការដឹកនាំយុវជនលេងល្បែងប្រជាប្រិយរួមមាន ដណ្តើមស្លឹកឈើ ពង្រាត់កូនក្រមុំ បោះអង្គញ់ វាយក្អម រាំដណ្តើមកៅអី ព្រមទាំងបង្ហាញសមត្ថភាពក្នុងការរាំរបាំ និងគោះត្រឡោក។ ជាពិសេស កម្មវិធីមានរួមបញ្ចូលការបង្ហាញសមត្ថភាពនៃនិស្សិតក្នុងការច្រៀង សម្តែង និងដាក់បង្ហាញស្នាដៃគំនូរនៃវិចិត្រករគំនូរបែបត្លុកកំប្លែងផងដែរ។

បន្ថែមពីនេះ និស្សិតបានរក្សានូវវិន័យរបស់ខ្លួនផ្ទាល់ និង អ្នកចូលរួមដែលជាសិស្សបានយ៉ាងខ្ជាប់ខ្ជួនដោយមិនមានការកម្សាន្តទាំងឡាយណាដែលក្រសួងអប់រំបានដាក់គោលការណ៍នោះឡើយ។

ដូចសព្វដង វេលានៃចូលឆ្នាំខ្មែរ ជាវេលានៃការជួបជុំ និងនាំមកនូវស្នាមញញឹមទទួលទេវតាឆ្នាំថ្មី ភាគច្រើនមនុស្សគ្រប់វ័យនាំគ្នាលេងល្បែងប្រជាប្រិយ ដើម្បីបន្តរក្សានូវវប្បធម៌ប្រពៃណីដែលបានបន្សល់ទុកជាកេរតំណែលពីដូនតា។ សង្រ្កាន្តខេមតិច បានប្រមូលផ្តុំយុវជនដែលជានិស្សិតជាង ៣០ នាក់ ក្នុងការបែងចែកការងារដើម្បីញ៉ាំងកម្មវិធីឱ្យមានភាពសប្បាយរីករាយក្នុងការអបអរសាទរពិធីចូលឆ្នាំខ្មែរប្រពៃណីជាតិដែលនឹងមកដល់ក្នុងពេលខាងមុខនេះ បានយ៉ាងសកម្ម និងនាំមកនូវភាពសប្បាយរីករាយសម្រាប់អ្នកចូលរួម៕