លោក សុវណ្ណ ភីឡុង ទទួលបានគ្រឿងឥស្សរិយយសសិល្បៈ និងអក្សរសាស្រ្តថ្នាក់អស្សឫទ្ធិ ពីឯកអគ្គរដ្ឋទូតបារាំង «ចំពោះការប្តេជ្ញាចិត្តលើវិស័យថតរូបនៅកម្ពុជា»

ភ្នំពេញ៖ លោកឯកអគ្គរដ្ឋទូតបារាំង ហ្សាក់ ប៉ឺឡេ កាលពីថ្ងៃទី០១ ខែមេសា បានបំពាក់គ្រឿងឥស្សរិយយសសិល្បៈ និងអក្សរសាស្រ្តថ្នាក់អស្សឫទ្ធិ ជូនដល់ លោក សុវណ្ណ ភីឡុង ដែលជាតួអង្គសំខាន់នៃវិស័យថតរូបនៅកម្ពុជា។ លោក សុវណ្ណ ភីឡុង ជាប្រធានសមាគមរូបថតភ្នំពេញ និងនាយកសាលាស្ទូឌីយ៉ូអ៊ីមេចស៍ ផ្ទះរូបថត។

យោងតាមគេហទំព័រ Ambassade de France au Cambodge បានឱ្យដឹងថា លោក សុវណ្ណ ភីឡុង មានប្រវត្តិការងារគួរឱ្យកត់សម្គាល់ទាំងលើទិដ្ឋភាពសិល្បៈ និងការចែករំលែក ក្នុងនាមជាប្រធានសមាគមរូបថតភ្នំពេញ និងនាយកសាលាស្ទូឌីយ៉ូអ៊ីមេចស៍ ផ្ទះរូបថត។ តាមរយៈការងាររបស់លោក បានបង្ហាញពីការប្តេជ្ញាចិត្តដ៏មោះមុតចំពោះវិស័យថតរូប និងការផ្ទេរចំណេះដឹងដល់យុវជន យុវ​នារីជំនាន់ក្រោយពាក់ព័ន្ធនឹងវិស័យមួយនេះ។

បើតាមប្រភពដដែល លោក សុវណ្ណ ភីឡុង បានបង្ហាញថារូបថតគឺលើសពីពេលវេលាមួយដែលនៅនឹងថ្កល់ ពោលគឺធ្វើឱ្យមើលឃើញក្នុងបែបផែនមួយទៀត ស្វែងយល់ និងលើក​ឡ់ើង​ជាសំណួរអំពីពិភពដែលនៅជុំវិញខ្លួនយើង។ តាមរយៈការបំពាក់គ្រឿងឥស្សរិយយសខាងលើ ប្រទេសបារាំងទទួលស្គាល់ការចូលរួមចំណែករបស់លោក សុវណ្ណ ភីឡុង ក្នុងសិល្បៈ និងទំនាក់ទំនងរវាងប្រទេសបារាំង និងប្រទេសកម្ពុជា។

គួរបញ្ជាក់ថា សមាគមរូបថតភ្នំពេញ គឺជាអង្គការមិនរកប្រាក់ចំណេញបង្កើតឡើងក្នុងគោលបំណងផ្តល់អំណាច និងផ្តល់ជំនាញបច្ចេកទេសថតរូប និងអភិវឌ្ឍឱកាសបណ្តុះបណ្តាលសម្រាប់អ្នកថតរូប និងយុវជន។ ចំណែកឯ Studio Images ជាសាលាថតរូប និងប្រព័ន្ធផ្សព្វផ្សាយ ដែលមានផ្តល់ជូននូវកម្មវិធីសិក្សារយៈពេលពីរឆ្នាំដែលផ្តល់នូវចំណេះដឹងផ្នែកទ្រឹស្តី និងការអនុវត្តជាក់ស្តែងនៅក្នុងវិស័យសិល្បៈ និងបច្ចេកទេសនៃការថតរូប៕