.png?1741682398)
ភ្នំពេញ៖ អាហារូបករណ៍កម្មវិធីស្រាវជ្រាវនៅប្រទេសតួកគី ផ្តល់ជូននិស្សិតដែលកំពុងសិក្សាថ្នាក់បរិញ្ញាបត្របានបទពិសោធន៍ស្រាវជ្រាវនៅ សាកលវិទ្យាល័យ Sabanci University រយៈពេល ៨សប្តាហ៍ បើកទទួលពាក្យដល់ថ្ងៃទី ១១ មេសា ២០២៥។ អាហារូបករណ៍នេះផ្តល់ជូននិស្សិតលើការចំណាយប្រចាំខែ ការស្នាក់នៅ ធ្វើដំណើរ និងការសិក្សា។
យោងតាមការផ្សព្វផ្សាយនៃក្រសួងអប់រំ បានឱ្យដឹងថា អាហារូបករណ៍នេះ ត្រូវបានផ្តល់ជូនដោយ Turkiye Scholarship និងសាកលវិទ្យាល័យ Sabanci University ដើម្បីនិស្សិតដែលកំពុងសិក្សាថ្នាក់បរិញ្ញាបត្រអាចទទួលបានបទពិសោធន៍ក្នុងការសិក្សាស្រាវជ្រាវនៅប្រទេសតួកគី ចាប់ពីថ្ងៃទី ៧ កក្កដា ដល់ ២៨ សីហា ២០២៥ នៅសាកលវិទ្យាល័យ Sabanci។
អាហារូបករណ៍នេះនឹងរ៉ាប់រងចំណាយស្នាក់នៅ ថ្លៃសិក្សា ការធ្វើដំណើរទាំងទៅនិងត្រលប់មកប្រទេសវិញ សកម្មភាពពាក់ព័ន្ធនឹងសង្គម និងវប្បធម៌ ជាពិសេសនឹងមានផ្តល់ជាប្រាក់សម្រាប់់និស្សិតក្នុងការចំណាយប្រចាំខែ។
បើតាមការជូនដំណឹង លក្ខខណ្ឌជ្រើសរើសនៃអាហារូបករណ៍នេះ បេក្ខជនត្រូវតែជាសិស្សដែលកំពុងសិក្សាថ្នាក់បរិញ្ញាបត្រ ដែលមានប្រវត្តិការសិក្សាល្អ និងអាចប្រើប្រាស់ភាសាអង់គ្លេសបានល្អ។ សិស្សអាចដាក់ពាក្យដោយជ្រើសរើសការស្រាវជ្រាវរហូតដល់៦ ដែលខាងសាកលវិទ្យាល័យ Sabanci បានប្រកាស និងសាកសមជាមួយនឹងចំណាប់អារម្មណ៍របស់សិស្សផ្ទាល់ តែចុងក្រោយសិស្សតម្រូវឱ្យធ្វើតែមួយតែប៉ុណ្ណោះក្នុងចំណោម៦ដែលបានជ្រើសរើស។
គួរបញ្ជាក់ថា អាហារូបករណ៍នេះបើកទទួលពាក្យដល់ថ្ងៃទី ១១ មេសា ២០២៥ ដែលសិស្សអាចដាក់ពាក្យតាមរយៈតំណភ្ជាប់ https://pure.sabanciuniv.edu/node/add/application ៕
.jpg?1743583939)
