សាកលវិទ្យាល័យខេមតិចរៀបចំសង្ក្រាន្តនៅថ្ងៃស្អែក បើកឱ្យសាធារណជនចូលរួមដោយសេរី

ភ្នំពេញ៖ សាកលវិទ្យាល័យខេមតិចរៀបចំសង្ក្រាន្តនៅថ្ងៃស្អែក សម្រាប់សាធារណជនចូលរួមដោយសេរី រួមមានសកម្មភាពដូចជា ការលេងល្បែងប្រជាប្រិយ ការដាក់បង្ហាញស្នាដៃនិស្សិត ការរាំរបាំប្រពៃណី ការសម្តែងនិងច្រៀង ព្រមទាំងការគូសរូប។ កម្មវិធីនេះនឹងចាប់ផ្តើមនាម៉ោង៩ព្រឹក ដល់ម៉ោង ១០ យប់ នៅទីតាំងនៃសាកលវិទ្យាល័យខេមតិច។

សាកលវិទ្យាល័យខេមតិច នឹងរៀបចំកម្មវិធីសង្រ្កាន្តដើម្បជាការអបអរសាទរចូលឆ្នាំខ្មែរប្រពៃណីជាតិ ក្នុងគោលបំណងចូលរួមចំណែកលើកស្ទួយវប្បធម៌ និងគាំទ្រដល់ភាពច្នៃប្រឌិតរបស់និស្សិត និងសហគមន៍ តាមរយៈការដាក់បង្ហាញស្នាដៃនិស្សិត ការកម្សាន្តរួមមាន ការលេងល្បែងប្រជាប្រិយ ហ្គេមបេសកកម្ម ការសម្តែងនិងច្រៀងដោយនិស្សិត រួមមានការសម្តែងប្រពៃណី ការរាំបែប K-pop ដោយនិស្សិត ការដាក់បង្ហាញស្នាដៃគំនូរថ្លុករបស់យុវជន ញឹម ឆាយឡុង ព្រមទាំងសកម្មភាពនានាជាច្រើនទៀតនៅសាលាខេមតិច នាថ្ងៃទី ០៣ មេសា ២០២៥។

ការលេងល្បែងប្រជាប្រិយ និងការតាំងពិព័រណ៍ស្នាដៃនិស្សិត និងគំនូរថ្លុក ចាប់ផ្តើមពីម៉ោង ៩ ព្រឹក ចំណែកឯសកម្មភាពសម្តែងផ្សេងៗទៀតនឹងចាប់ផ្តើមពីម៉ោង ៣ រសៀល រួមមានការសម្តែងរបាំជូនពរ ការរាំដណ្តើមកៅអី ការច្រៀង និងរាំរបាំគោះត្រឡោក ព្រមទាំងមានការបណ្តែតប្រទីបនាពេលរាត្រី។

កម្មវិធីសង្ក្រាន្តនេះមានការចូលរួមស្ម័គ្រចិត្តដោយនិស្សិត ដើម្បីបង្កើតបរិយាកាសរីករាយ ក្នុងការលើកស្ទួយវប្បធម៌ប្រពៃណីជាតិក្នុងឱកាសចូលឆ្នាំខ្មែរនាពេលខាងមុខនេះ។ គួរបញ្ជាក់ថា សាកលវិទ្យាល័យខេមតិច មានទីតាំងស្ថិតនៅ សង្កាត់ព្រែកតាសេក ទីក្រុងរណបជ្រោយចង្វារ ខណ្ឌជ្រោយចង្វារ រាជធានីភ្នំពេញ៕