«សន្និបាតប្លុកឆេនកម្ពុជា២០២៥» បានបង្ហាញពីតួនាទីប្លុកឆេនក្នុងការជំរុញកំណើនសេដ្ឋកិច្ច ទៅកាន់សាធារណជនជាង ១០០០ នាក់

ភ្នំពេញ៖ សន្និបាតប្លុកឆេនកម្ពុជា២០២៥ កាលពីថ្ងៃទី ៣០ ខែមីនា ឆ្នាំ ២០២៥ បានប្រជុំសាធារណជនជាង ១០០០ នាក់ រួមមាន អ្នកចូលរួម ម្ចាស់អាជីវកម្ម វាគ្មិនកិត្តិយស តាមរយៈការដាក់បង្ហាញស្តង់ប្រមាណចំនួន២០ កម្មវិធីសិក្ខាសាលា និងកិច្ចពិភាក្សា ពីវាគ្មិនសរុបប្រមាណ ២០នាក់ នៅទីតាំងសាកលវិទ្យាល័យជាតិគ្រប់គ្រង ដើម្បីឱ្យសាធារណជនឈ្វេងយល់ពីអនាគតនៃប្លុកឆេនក្នុងប្រទេសកម្ពុជា។

«សន្និបាតប្លុកឆេនកម្ពុជា២០២៥» បានប្រព្រឹត្តទៅរួមមានសកម្មភាពមួយចំនួនដូចជា ការពិភាក្សាតុមូលជាមួយអ្នកជំនាញ វគ្គបណ្តុះបណ្តាលជាក់ស្តែងអំពីការអភិវឌ្ឍប្លុកឆេន កិច្ចសន្យាឆ្លាតវៃ និងការអនុវត្តក្នុងជីវិតពិត ការបង្ហាញគម្រោងសហគ្រិនថ្មី និងឱកាសតភ្ជាប់ជាមួយអ្នកវិនិយោគ អ្នកអភិវឌ្ឍន៍ និងអ្នកជំនាញក្នុងវិស័យនេះ ព្រមទាំងស្វែងយល់ពីព័ត៌មានអំពីបទប្បញ្ញត្តិ និងយុទ្ធសាស្រ្តរដ្ឋាភិបាល អំពីវិស័យឌីជីថលនៃកម្ពុជា ដែលមានការចូលរួមដោយវាគ្មិនកិត្តិយសប្រមាណ ២០​ នាក់ ចែករំលែកនៅក្នុងសិក្ខាសាលាចំនួន ៦ និងកិច្ចពិភាក្សាតុមូលចំនួន ២ នាថ្ងៃទី ៣០ មីនា ២០២៥។

កម្មវិធីនេះ គឺជាព្រឹត្តិការណ៍ធំបំផុតក្នុងប្រទេសដែលផ្តោតលើការចែករំលែកចំណេះដឹង និងការអភិវឌ្ឍប្លុកឆេន ដែលជាវេទិកាសម្រាប់អ្នកដឹកនាំឧស្សាហកម្ម អ្នកច្នៃប្រឌិត និងអ្នករៀបចំបទប្បញ្ញត្តិ ដើម្បីជំរុញការទទួលយកប្លុកឆេន និងការច្នៃប្រឌិតឌីជីថលនៅកម្ពុជា។ 

លោក ជា សុខហ៊ី ដែលជាប្រធានគណៈកម្មាធិការរៀបចំ បានលើកឡើងថា "ប្លុកឆេនកំពុងផ្លាស់ប្តូរឧស្សាហកម្មជុំវិញពិភពលោក ហើយកម្ពុជាកំពុងក្លាយជាកីឡាករល្អក្នុងការប្រែប្រួលនេះ។ លោកជឿជាក់ថា កម្មវិធីសន្និបាតប្លុកឆេននេះ មិនត្រឹមតែជាព្រឹត្តិការណ៍មួយទេ តែវាជាការផ្លាស់ប្តូរវិជ្ជមានមួយ។ កម្មវិធីនេះបានធ្វើឱ្យសាធារណជនជាង១ពាន់នាក់ មានឱកាសស្វែងយល់អំពី អនាគតនៃប្លុកឆេននៅកម្ពុជា និងបានផ្តល់ឱកាសជាច្រើនសម្រាប់អ្នកដែលចូលចិត្តក្នុងវិស័យនេះបានជួបគ្នាក្នុងការសហការនាពេលខាងមុខ។

គួរបញ្ជាក់ថា កម្មវិធីនេះ ត្រូវបានសហការរៀបចំដោយ Startup Grind Cambodia, មហាវិទ្យាល័យសេដ្ឋកិច្ចឌីជីថល NUM និងសហគមន៍ប្លុកឆេនកម្ពុជា ដើម្បីផ្តល់ជូននូវ វេទិកាសិក្សា និងអន្តរកម្មដែលរួមបញ្ចូលទាំងសន្និសីទ ការពិភាក្សាតុមូល វគ្គបណ្តុះបណ្តាល កម្មវិធីបង្ហាញសហគ្រិន និងឱកាសបង្កើតបណ្តាញ។ ពិភាក្សានេះបានបង្ហាញពីរបៀបដែលប្លុកឆេនអាចជួយជំរុញកំណើនសេដ្ឋកិច្ចនាពេលអនាគត។សិក្ខាសាលាទាំងនេះបានផ្តល់ឱកាសសម្រាប់អ្នកចូលរួមជ្រាបយល់បន្ថែមអំពីប្លុកឆេន និងវិធីសាស្ត្រ ដែលអាចអនុវត្តបាន៕