ក្រសួងអប់រំ ផ្តល់មូលនិធិស្រាវជ្រាវខ្នាតធំនិងខ្នាតតូច ជូនបុគ្គលិកអប់រំ ឬអ្នកស្រាវជ្រាវ នៅតាមគ្រឹះស្ថានឧត្តមសិក្សា ដើម្បីបង្ហាញសមត្ថភាព និងអភិវឌ្ឍជំនាញស្រាវជ្រាវ

ភ្នំពេញ៖ ក្រសួងអប់រំ អនុវត្តមូលនិធិស្រាវជ្រាវឧត្តមសិក្សាក្រោមគម្រោងកែលម្អការអប់រំឧត្តមសិក្សាទី២ ចាប់ពីឆ្នាំ២០២៥-២០៣០ តាមរយៈការផ្តល់ មូលនិធិស្រាវជ្រាវខ្នាតធំ និងមូលនិធិស្រាវជ្រាវខ្នាតតូច ជូនបុគ្គលិកអប់រំ ឬអ្នកស្រាវជ្រាវ នៅតាមគ្រឹះស្ថានឧត្តមសិក្សា ដើម្បីបង្ហាញសមត្ថភាពស្រាវជ្រាវ អភិវឌ្ឍជំនាញស្រាវជ្រាវនិងកសាងមូលដ្ឋាន គ្រឹះសកម្មភាពស្រាវជ្រាវនាពេលអនាគត។

យោងតាមក្រសួងអប់រំ ការអនុវត្តមូលនិធិស្រាវជ្រាវឧត្តមសិក្សាក្រោមគម្រោងកែលម្អការអប់រំឧត្តមសិក្សាទី២ ចាប់ពីឆ្នាំ២០២៥-២០៣០ ដើម្បី ចូលរួមចំណែកសម្រេចគោលដៅ ដែលបានកំណត់នៅក្នុងផែនការយុទ្ធសាស្ត្រអប់រំឆ្នាំ២០២៤-២០២៨និងយុទ្ធសាស្ត្រ បញ្ចកោណដំណាក់កាលទី១របស់រាជរដ្ឋាភិបាល។ មូលនិធិស្រាវជ្រាវឧត្តមសិក្សានេះ មានចំនួន២ ប្រភេទ គឺ មូលនិធិស្រាវជ្រាវខ្នាតធំផ្តល់មូលនិធិអតិបរមា ៥០ ០០០ ដុល្លារអាមេរិក និងមូលនិធិស្រាវជ្រាវខ្នាតតូច ផ្តល់មូលនិធិអតិបរមា ២០ ០០០ ដុល្លារអាមេរិក។

បើតាមក្រសួងអប់រំ មូលនិធិស្រាវជ្រាវខ្នាតធំ ផ្តោតលើស្ទែម កសិកម្ម វិទ្យាសាស្ត្រសង្គម និងមនុស្សសាស្ត្រ ដោយគាំទ្រគម្រោង ស្រាវជ្រាវដែលមានរយៈ១-៣ឆ្នាំ ផ្តល់ជូនសម្រាប់បុគ្គលិកអប់រំ ឬអ្នកស្រាវជ្រាវ នៅតាមគ្រឹះស្ថានឧត្តមសិក្សា ដើម្បីកសាងសមត្ថភាព បង្កើតគម្រោងស្រាវជ្រាវបែបសហការ និងលើកកម្ពស់ភាពជាដៃគូឧស្សាហកម្ម។ ចំណែកឯ មូលនិធិស្រាវជ្រាវខ្នាតតូច ផ្តោតលើស្ទែម កសិកម្ម វិទ្យាសាស្ត្រសង្គម និងមនុស្សសាស្ត្រ ដោយគាំទ្រ គម្រោងស្រាវជ្រាវដែលមានរយៈ១-២ ឆ្នាំ ផ្តល់ជូនសម្រាប់បុគ្គលិកអប់រំ ឬអ្នក ស្រាវជ្រាវ នៅតាមគ្រឹះស្ថានឧត្តមសិក្សា ដើម្បីបង្ហាញសមត្ថភាពស្រាវជ្រាវ អភិវឌ្ឍជំនាញស្រាវជ្រាវនិងកសាងមូលដ្ឋាន គ្រឹះសកម្មភាពស្រាវជ្រាវនាពេលអនាគត។

គួរបញ្ជាក់ថា គ្រឹះស្ថានឧត្តមសិក្សាសាធារណៈ និងឯកជនដែលមានបំណងដាក់ស្នើសុំមូលនិធិស្រាវជ្រាវឧត្តមសិក្សា ក្រោម គម្រោងកែលម្អការអប់រំឧត្តមសិក្សាទី២ សូមស្កេន QR Code ឬតំណភ្ជាប់ខាងក្រោម ដើម្បីទាញយកព័ត៌មានលម្អិត និងទម្រង់សំណើស្រាវជ្រាវ និងដាក់ស្នើមកនាយកដ្ឋានស្រាវជ្រាវនិងនវានុវត្តន៍ នៃក្រសួងអប់រំ ចាប់ពីថ្ងៃ ផ្សាយដំណឹងនេះតទៅរហូតដល់ថ្ងៃទី២១ ខែមេសា ឆ្នាំ២០២៥៕