សិស្សពីររូបមកពីវិទ្យាល័យមុនីវង្ស បាន«ជ័យលាភីលេខ១» ក្នុងការប្រកួតបញ្ចេញមតិជាសាធារណៈជាភាសាបារាំងវគ្គផ្តាច់ព្រ័ត្រនៅម៉ាឡេស៊ី

ភ្នំពេញ៖ សិស្សវិទ្យាល័យពីររូបមកពីថ្នាក់ពីរភាសាបារាំង-ខ្មែរនៃវិទ្យាល័យព្រះមុនីវង្ស នៃខេត្តបាត់ដំបង យុវតី ទី ដាឡែន និង យុវជន ពីរូ សុបញ្ញា បាន«ជ័យលាភីលេខ១» ក្នុងវគ្គផ្តាច់ព្រ័ត្រនៃការប្រកួតបញ្ចេញមតិជាសាធារណៈជាភាសាបារាំង ថ្នាក់តំបន់អាស៊ីប៉ាស៊ីហ្វិក ក្រោយប៉ះការប្រកួតជាមួយនឹងសិស្សមកពីវិទ្យាល័យមកពីប្រទេសវៀតណាម។ កម្មវិធីប្រកួតវគ្គផ្តាច់ព្រ័ត្រនេះបានប្រព្រឹត្តទៅនាថ្ងៃទី ២៨ មីនា ២០២៥ នៅទីក្រុងគួឡាឡាំពួ នៃប្រទេសម៉ាឡេស៊ី។

យោងតាមគេហទំព័រ Ambassade de France au Cambodge កាលពីថ្ងៃ ២១ មករា ២០២៥ បានឱ្យដឹងថាមុននឹង បេក្ខជន យុវតី ទី ដាឡែន និង យុវជន ពីរូ សុបញ្ញា មានឱកាសតំណាងកម្ពុជាចូលរួមប្រកួតនៅតំបន់អាស៊ីប៉ាស៊ីហ្វិក បេក្ខជនទាំងពីររូបនេះបានឆ្លងកាត់ការប្រកួតជាមួយនឹងយុវជន ១៧ រូបផ្សេងទៀត នៅ វិទ្យាល័យព្រះមុនីវង្ស បាត់ដំបង។

បើតាមការបង្ហោះជាសាធារណៈលើគេហទំព័រ លោក ហង់ ជួនណារ៉ុន រដ្ឋមន្រ្តី ក្រសួងអប់រំ នាថ្ងៃទី ២៩ មីនា ២០២៥ នេះ បេក្ខជនទាំងពីររូបដែលតំណាងកម្ពុជាក្នុងការប្រកួតលើឆាកអន្តរជាតិនេះជាសិស្សមកពីកម្មវិធីថ្នាក់ពីរភាសាបារាំង-ខ្មែរនៃវិទ្យាល័យព្រះមុនីវង្ស ខេត្តបាត់ដំបង ។​ បេក្ខជនទាំងពីររូប បានទទួលបានចំណាត់លេខ១ ក្នុងការប្រកួតបញ្ចេញមតិជាសាធារណៈ ជាភាសាបារាំង (Concours d’éloquence)លក្ខណៈអន្តរជាតិនៅវគ្គផ្ដាច់ព្រ័ត្រទល់នឹងក្រុមបេក្ខជនមកពីប្រទេសវៀតណាម ក្នុងក្របខ័ណ្ឌគ្រឹះស្ថានសិក្សាទទួលបានស្លាកសញ្ញាឡាប៊ែលហ្រ្វង់(LabelFrancÉducation)នៅទីក្រុងគួឡាឡាំពួប្រទេសម៉ាឡេស៊ី។

គួរបញ្ជាក់ថា ឆ្នាំនេះ គម្រោងខាងលើដែលត្រូវបានស្នើឡើងដោយទីភ្នាក់ងារគ្រឹះស្ថានសិក្សាបារាំងនៅបរទេសសម្រាប់គ្រឹះស្ថានដែលទទួលបានស្លាក "LabelFrancEducation" ផ្តោតលើ «ហ្វ្រង់កូហ្វូនី៖ ដំណើរនៅក្នុងពេលវេលា និងលម្ហ»៕