ក្រសួងប្រៃសណីយ៍ និងក្រុមហ៊ុន Tiktok បានចែករំលែកពីសុវត្ថិភាពលើប្រព័ន្ធអនឡាញ និងគោលការណ៍ណែនាំTikTok ដល់សាធារណជន ជាង២៥០នាក់

ភ្នំពេញ៖ ក្រសួងប្រៃសណីយ៍ នៅព្រឹកថ្ងៃទី១៩ ខែមីនា ឆ្នាំ២០២៥ បានសហការជាមួយក្រុមហ៊ុន TikTok រៀបចំសិក្ខាសាលា ស្ដីពីសុវត្ថិភាពលើប្រព័ន្ធអនឡាញ និងគោលការណ៍ណែនាំរបស់ក្រុមហ៊ុន TikTok ទៅកាន់អ្នកសារព័ត៌មាន អ្នកផលិតមាតិកា និងសាធារណជន សរុបប្រមាណ ២៥០នាក់ នៅសាលប្រជុំជាន់ទី៣ ទីស្តីការក្រសួងប្រៃសណីយ៍។

សិក្ខាសាលាផ្សព្វផ្សាយនេះ រៀបចំឡើងក្នុងគោលបំណងចែករំលែកអំពីឧត្តមានុវត្តន៍នៃការការពារសុវត្ថិភាពលើប្រព័ន្ធអនឡាញ និងគោលការណ៍ណែនាំរបស់ក្រុមហ៊ុន TikTok រួមមាន គោលការណ៍ណែនាំសហគមន៍ ឱកាសរកប្រាក់ចំណូល (TikTok Monetization) សម្រាប់អ្នកផលិតមាតិកា និងការប្រើប្រាស់បណ្តាញសង្គម TikTok ប្រកបដោយប្រសិទ្ធភាព ជូនដល់ក្រសួង ស្ថាប័ន អ្នកសារព័ត៌មាន អ្នកផលិតមាតិកា និងសាធារណជន។

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ បានលើកឡើងថា សិក្ខាសាលានេះ មិនគ្រាន់តែផ្តល់នូវការយល់ដឹងបន្ថែមទៀតអំពីប្រព័ន្ធបណ្តាញសង្គមប៉ុណ្ណោះទេ ប៉ុន្តែក៏ជួយផ្តល់នូវវិធីសាស្ត្រ និងមធ្យោបាយដល់អ្នកផលិតមាតិកាឱ្យយល់ដឹង និងរៀបចំមាតិការបស់ខ្លួនកាន់តែមានខ្លឹមសារល្អ ទាក់ទាញអ្នកស្តាប់និងអ្នកទស្សនា ហើយអ្នកផលិតមាតិកានឹងអាចរកចំណូលបាន ដែលនេះជាការផ្តល់ឱកាសរបស់ក្រុមហ៊ុន TikTok ដល់អ្នកបង្កើតមាតិកានៅកម្ពុជា។

គួររំលឹកថា សិក្ខាសាលាផ្សព្វផ្សាយ ស្ដីពីសុវត្ថិភាពលើប្រព័ន្ធអនឡាញ និងគោលការណ៍ណែនាំរបស់ក្រុមហ៊ុន TikTok មានការចូលរួមដោយ លោក ជា វ៉ាន់ដេត រដ្ឋមន្ត្រីក្រសួងប្រៃសណី និងលោកស្រី Chanida Klyphum ប្រធានផ្នែកគោលនយោបាយសាធារណៈរបស់ក្រុមហ៊ុន TikTok ប្រចាំអាស៊ីអាគ្នេយ៍ រៀបចំកាលពីថ្ងៃទី ១៩ មីនា​ ២០២៥ នៅក្រសួងប្រៃសណីយ៍៕